tamir-e-zindagi ko numayan kiya gaya

ta.amīr-e-zindagī ko numāyāñ kiyā gayā

taḳhrīb-e-kā.enāt kā sāmāñ kiyā gayā

gulshan kī shāḳh shāḳh ko vīrāñ kiyā gayā

yuuñ bhī ilāj-e-tañgi-e-dāmāñ kiyā gayā

kho.e ho.uuñ pe terī nazar kī navāzisheñ

ā.īna de ke aur bhī hairāñ kiyā gayā

āvārgī-e-zulf se āsūdgī milī

āsūdgī milī ki pareshāñ kiyā gayā

vo ḳhush-nasīb huuñ ki ġham-e-iltifāt se

mere ġham-e-hayāt kā darmāñ kiyā gayā

tanhā.iyāñ bichhā ke jahān-e-ḳharāb meñ

mere liye nigāh kā sāmāñ kiyā gayā

phailā ke be-sabātī-e-ālam kī dāstāñ

mujh par harām kaif-e-bahārāñ kiyā gayā

bhaḌkā ke ātish-e-ruḳh-e-jānāñ kī aarzū

mujh ko rahīn-e-ātish-e-daurāñ kiyā gayā

naumīdī-e-talab pe chaḌhā ke talab kā rañg

ummīd-e-dīd-e-dost ko arzāñ kiyā gayā

ye bhī karam ki mujh ko shabān-e-siyāh meñ

māmūr-e-dil-navāzī-e-hijrāñ kiyā gayā

jam.iyyat-e-jamāl kā husn-e-kamāl dekh

āḳhir yahī huā ki pareshāñ kiyā gayā

de kar chaman ko bahār-o-ḳhizāñ kā rañg

mere ḳhayāl-o-ḳhvāb pe ehsāñ kiyā gayā

aa aur kā.enāt ke phūloñ kī daad de

jin se tirā jamāl numāyāñ kiyā gayā

tamir-e-zindagi ko numayan kiya gaya

taKHrib-e-kaenat ka saman kiya gaya

gulshan ki shaKH shaKH ko viran kiya gaya

yun bhi ilaj-e-tangi-e-daman kiya gaya

khoe houn pe teri nazar ki nawazishen

aaina de ke aur bhi hairan kiya gaya

aawargi-e-zulf se aasudgi mili

aasudgi mili ki pareshan kiya gaya

wo KHush-nasib hun ki gham-e-iltifat se

mere gham-e-hayat ka darman kiya gaya

tanhaiyan bichha ke jahan-e-KHarab mein

mere liye nigah ka saman kiya gaya

phaila ke be-sabaati-e-alam ki dastan

mujh par haram kaif-e-bahaaran kiya gaya

bhaDka ke aatish-e-ruKH-e-jaanan ki aarzu

mujh ko rahin-e-atish-e-dauran kiya gaya

naumidi-e-talab pe chaDha ke talab ka rang

ummid-e-did-e-dost ko arzan kiya gaya

ye bhi karam ki mujh ko shaban-e-siyah mein

mamur-e-dil-nawazi-e-hijran kiya gaya

jamiyyat-e-jamal ka husn-e-kamal dekh

aaKHir yahi hua ki pareshan kiya gaya

de kar chaman ko bahaar-o-KHizan ka rang

mere KHayal-o-KHwab pe ehsan kiya gaya

aa aur kaenat ke phulon ki dad de

jin se tera jamal numayan kiya gaya