تاثیر کی طرح کبھی تعبیر کی طرح

تاثیر کی طرح کبھی تعبیر کی طرح

تم مل گئے مجھے مری تقدیر کی طرح

اس شہر دل پہ آپ کا قبضہ رہے سدا

آزاد ہو نہ پاؤں میں کشمیر کی طرح

میں نے زمانے بھر کے لٹیروں کی آنکھ سے

تم کو چھپا کے رکھا ہے جاگیر کی طرح

تیرے لبوں کو دیکھ کے سنتا ہوں میں تجھے

تیرا سکوت ہوتا ہے تقریر کی طرح

تو جانتا نہیں ہے وہ چپ چاپ آدمی

منہ میں زبان رکھتا ہے شمشیر کی طرح

چھوڑا نہیں ہے آج بھی مصروفیات نے

اتوار لگ رہا ہے مجھے پیر کی طرح

کیا ہو سکے گا کوئی تمہاری طرح رضاؔ

تم تو نہیں ہو اپنی ہی تصویر کی طرح