hum roz jo laDte hain tamasha nahin hota

ham roz jo laḌte haiñ tamāshā nahīñ hotā

ma.amūl kā jhagḌā koī jhagḌā nahīñ hotā

maiñ bachche khilātā huuñ to vo jaate haiñ picture

ye roz kā rātib hai jo nāġha nahīñ hotā

leader kī ye pahchān ki vo phūltā jaa.e

shā.ir kī ye pahchān ki moTā nahīñ hotā

har ek mulāzim kā hai ye haal ki ghar meñ

chāval nahīñ hote kabhī aaTā nahīñ hotā

ye soch ki lauTātā nahīñ qarz kisī kā

ahbāb se māñgā huā qarzā nahīñ hotā

gar lāTrī uTh jaa.e to kyā ThaaT se guzre

ye ḳhvāb hai andhoñ kā jo puurā nahīñ hotā

har chiiz kī qillat hai 'rahīm' aaj vatan meñ

afsos ki kumba koī chhoTā nahīñ hotā

hum roz jo laDte hain tamasha nahin hota

mamul ka jhagDa koi jhagDa nahin hota

main bachche khilata hun to wo jate hain picture

ye roz ka raatib hai jo nagha nahin hota

leader ki ye pahchan ki wo phulta jae

shair ki ye pahchan ki moTa nahin hota

har ek mulazim ka hai ye haal ki ghar mein

chawal nahin hote kabhi aaTa nahin hota

ye soch ki lauTata nahin qarz kisi ka

ahbab se manga hua qarza nahin hota

gar laTri uTh jae to kya ThaT se guzre

ye KHwab hai andhon ka jo pura nahin hota

har chiz ki qillat hai 'rahim' aaj watan mein

afsos ki kumba koi chhoTa nahin hota