yun dil taras raha hai teri car dekh kar

yuuñ dil taras rahā hai tirī car dekh kar

lalchā.e jaise jaam ko mai-ḳhvār dekh kar

bālā-e-bām yā pas-e-dīvār kaun jaa.e

husn-e-butāñ ko raunaq-e-bāzār dekh kar

joḌe kā bhaav chāhiye degrē ke vazn par

qīmat baḌhā rahā huuñ ḳharīdār dekh kar

ab rickshaw-rāñ bhī gaate haiñ maḳhdūm kī ġhazal

shāyad asar huā hai ye bāzār dekh kar

donoñ kā laal ḳhuun bhī kyā ho gayā safed

laḌte haiñ log sub.ha-o-zunnār dekh kar

koī fasād chorī Dakaitī na hādisa

hairān huuñ maiñ aaj kā aḳhbār dekh kar

kis samt jā rahe haiñ batā.ūñ maiñ shaiḳh jī

andāza ho chukā hai ye raftār dekh kar

mulk-e-ḳhudā bhī tang huā pā-e-lang par

ahl-e-vatan ko bar-sar-e-paikār dekh kar

ab ai 'rahīm' aap bhī sannyās lījiye

rahrav chale hai raah ko hamvār dekh kar

yun dil taras raha hai teri car dekh kar

lalchae jaise jam ko mai-KHwar dekh kar

baala-e-baam ya pas-e-diwar kaun jae

husn-e-butan ko raunaq-e-bazar dekh kar

joDe ka bhaw chahiye degree ke wazn par

qimat baDha raha hun KHaridar dekh kar

ab rickshaw-ran bhi gate hain maKHdum ki ghazal

shayad asar hua hai ye bazar dekh kar

donon ka lal KHun bhi kya ho gaya safed

laDte hain log subha-o-zunnar dekh kar

koi fasad chori Dakaiti na hadisa

hairan hun main aaj ka aKHbar dekh kar

kis samt ja rahe hain bataun main shaiKH ji

andaza ho chuka hai ye raftar dekh kar

mulk-e-KHuda bhi tang hua pa-e-lang par

ahl-e-watan ko bar-sar-e-paikar dekh kar

ab ai 'rahim' aap bhi sannyas lijiye

rahraw chale hai rah ko hamwar dekh kar