kasrat mein bhi wahdat ka tamasha nazar aaya

kasrat meñ bhī vahdat kā tamāshā nazar aayā

jis rañg meñ dekhā tujhe yaktā nazar aayā

jab us ruḳh-e-pur-nūr kā jalva nazar aayā

ka.aba nazar aayā na kalīsā nazar aayā

ye husn ye shoḳhī ye karishma ye adā.eñ

duniyā nazar aa.ī mujhe to kyā nazar aayā

ik sarḳhushi-e-ishq hai ik be-ḳhudī-e-shauq

āñkhoñ ko ḳhudā jaane mirī kyā nazar aayā

jab dekh na sakte the to dariyā bhī thā qatra

jab aañkh khulī qatra bhī dariyā nazar aayā

qurbān tirī shān-e-ināyat ke dil o jaañ

is kam-nigahī par mujhe kyā kyā nazar aayā

har rañg tire rañg meñ Duubā huā niklā

har naqsh tirā naqsh-e-kaf-e-pā nazar aayā

āñkhoñ ne dikhā dī jo tire ġham kī haqīqat

aalam mujhe saarā tah-o-bālā nazar aayā

har jalve ko dekhā tire jalvoñ se munavvar

har bazm meñ tū anjuman-ārā nazar aayā

kasrat mein bhi wahdat ka tamasha nazar aaya

jis rang mein dekha tujhe yakta nazar aaya

jab us ruKH-e-pur-nur ka jalwa nazar aaya

kaba nazar aaya na kalisa nazar aaya

ye husn ye shoKHi ye karishma ye adaen

duniya nazar aai mujhe to kya nazar aaya

ek sarKHushi-e-ishq hai ek be-KHudi-e-shauq

aankhon ko KHuda jaane meri kya nazar aaya

jab dekh na sakte the to dariya bhi tha qatra

jab aankh khuli qatra bhi dariya nazar aaya

qurban teri shan-e-inayat ke dil o jaan

is kam-nigahi par mujhe kya kya nazar aaya

har rang tere rang mein Duba hua nikla

har naqsh tera naqsh-e-kaf-e-pa nazar aaya

aankhon ne dikha di jo tere gham ki haqiqat

aalam mujhe sara tah-o-baala nazar aaya

har jalwe ko dekha tere jalwon se munawwar

har bazm mein tu anjuman-ara nazar aaya