tera dil yar agar mail kare hai

tirā dil yaar agar maa.il kare hai

to jaan ab tujh ko sāhib dil kare hai

tajallī ko nahīñ takrār hargiz

yahāñ takrār ab jāhil kare hai

ri.āyat buujh tū ma.ashūq kā jaur

ki tujh ko ishq meñ kāmil kare hai

tū kho mat diin ko duniyā ke pīchhe

koī ye kaam bhī aaqil kare hai

baḌī dushman tirī ġhaflat hai har-dam

ki tujh ko maut se ġhāfil kare hai

koī din ko chale aur qāsid-e-umar

ye raat aur din meñ do manzil kare hai

kisī ko kaam meñ tere nahīñ dark

abas 'hātim' ko tū shāmil kare hai

tera dil yar agar mail kare hai

to jaan ab tujh ko sahib dil kare hai

tajalli ko nahin takrar hargiz

yahan takrar ab jahil kare hai

riayat bujh tu mashuq ka jaur

ki tujh ko ishq mein kaamil kare hai

tu kho mat din ko duniya ke pichhe

koi ye kaam bhi aaqil kare hai

baDi dushman teri ghaflat hai har-dam

ki tujh ko maut se ghafil kare hai

koi din ko chale aur qasid-e-umar

ye raat aur din mein do manzil kare hai

kisi ko kaam mein tere nahin dark

abas 'hatim' ko tu shamil kare hai