to tai hua na ki jab bhi likhna ruton ke sare azab likhna

to tai huā nā ki jab bhī likhnā rutoñ ke saare azaab likhnā

ujaaḌ mausam maiñ tapte sahrā ko aab likhnā habāb likhnā

qarār-e-jāñ hai tumhārā va.ada ki ghar pahuñch kar maiñ bhej dūñgī

maiñ muntazir hoñ tumhāre ḳhat kā shikāyatoñ kā javāb likhnā

mujhe yaqīñ hai nasīb merā na saath degā ki tajraba hai

sukūn ko iztirāb kahnā haqīqatoñ ko sarāb likhnā

ye terī ġhazleñ bayāñ nahīñ haiñ visāl-e-shab kī navāzishoñ kā

jo ho sake masnavī meñ saarā vo aks-e-kaif-e-shabāb likhnā

aziyyatoñ ke safar meñ maiñ ne bharam rakhā phir bhī hausloñ kā

munāfiqat ke jahāñ meñ mujh ko sadāqatoñ kā nisāb likhnā

ye daur ahl-e-qalam pe bhārī ki maslahat kī sabīl jaarī

gunāh ko bhī savāb kahnā babūl ko bhī gulāb likhnā

havā ke māthe pa darj tahrīr mausamoñ kī tamāzatoñ se

jo miT ga.ī hai to kyā huā hai na.e sire se ye baab likhnā

gulāb-rut meñ ye zardiyoñ ke nuqūsh chehre pe dekh lenā

hamāre baare maiñ kuchh na kahnā pa ibratoñ kī kitāb likhnā

harī bharī khetiyāñ kahāñ haiñ mire muqaddar ke zā.iche haiñ

shahīd-e-ishq-e-vafā kā 'tāhir' hatheliyoñ par hisāb likhnā

to tai hua na ki jab bhi likhna ruton ke sare azab likhna

ujaD mausam main tapte sahra ko aab likhna habab likhna

qarar-e-jaan hai tumhaara wada ki ghar pahunch kar main bhej dungi

main muntazir hon tumhaare KHat ka shikayaton ka jawab likhna

mujhe yaqin hai nasib mera na sath dega ki tajraba hai

sukun ko iztirab kahna haqiqaton ko sarab likhna

ye teri ghazlen bayan nahin hain visal-e-shab ki nawazishon ka

jo ho sake masnawi mein sara wo aks-e-kaif-e-shabab likhna

aziyyaton ke safar mein main ne bharam rakha phir bhi hauslon ka

munafiqat ke jahan mein mujh ko sadaqaton ka nisab likhna

ye daur ahl-e-qalam pe bhaari ki maslahat ki sabil jari

gunah ko bhi sawab kahna babul ko bhi gulab likhna

hawa ke mathe pa darj tahrir mausamon ki tamazaton se

jo miT gai hai to kya hua hai nae sire se ye bab likhna

gulab-rut mein ye zardiyon ke nuqush chehre pe dekh lena

hamare bare main kuchh na kahna pa ibraton ki kitab likhna

hari bhari khetiyan kahan hain mere muqaddar ke zaiche hain

shahid-e-ishq-e-wafa ka 'tahir' hatheliyon par hisab likhna