umr bhar usne isi tarah lubhaya hai mujhe

umr bhar us ne isī tarah lubhāyā hai mujhe

vo jo is dasht ke us paar se laayā hai mujhe

kitne ā.īnoñ meñ ik aks dikhāyā hai mujhe

zindagī ne jo akelā kabhī paayā hai mujhe

tū mirā kufr bhī hai tū mirā īmān bhī hai

tū ne luuTā hai mujhe tū ne basāyā hai mujhe

maiñ tujhe yaad bhī kartā huuñ to jal uThtā huuñ

tū ne kis dard ke sahrā meñ gañvāyā hai mujhe

tū vo motī ki samundar meñ bhī sho.ala-zan thā

maiñ vo aañsū ki sar-e-ḳhāk girāyā hai mujhe

itnī ḳhāmosh hai shab log Dare jaate haiñ

aur maiñ sochtā huuñ kis ne bulāyā hai mujhe

merī pahchān to mushkil thī magar yāroñ ne

zaḳhm apne jo kurede haiñ to paayā hai mujhe

vā.iz-e-shahr ke na.aroñ se to kyā khultī aañkh

ḳhud mire ḳhvāb kī haibat ne jagāyā hai mujhe

ai ḳhudā ab tire firdaus pe merā haq hai

tū ne is daur ke dozaḳh meñ jalāyā hai mujhe

umr bhar us ne isi tarah lubhaya hai mujhe

wo jo is dasht ke us par se laya hai mujhe

kitne aainon mein ek aks dikhaya hai mujhe

zindagi ne jo akela kabhi paya hai mujhe

tu mera kufr bhi hai tu mera iman bhi hai

tu ne luTa hai mujhe tu ne basaya hai mujhe

main tujhe yaad bhi karta hun to jal uThta hun

tu ne kis dard ke sahra mein ganwaya hai mujhe

tu wo moti ki samundar mein bhi shoala-zan tha

main wo aansu ki sar-e-KHak giraya hai mujhe

itni KHamosh hai shab log Dare jate hain

aur main sochta hun kis ne bulaya hai mujhe

meri pahchan to mushkil thi magar yaron ne

zaKHm apne jo kurede hain to paya hai mujhe

waiz-e-shahr ke naron se to kya khulti aankh

KHud mere KHwab ki haibat ne jagaya hai mujhe

ai KHuda ab tere firdaus pe mera haq hai

tu ne is daur ke dozaKH mein jalaya hai mujhe