uske dhyan ki dil mein pyas jaga li jae

us ke dhyān kī dil meñ pyaas jagā lī jaa.e

ek bhī shaam na phir us ke naam se ḳhālī jaa.e

ā.ankhoñ meñ kājal kī parat jamā lī jaa.e

sakhiyoñ se yuuñ priit kī jot chhupā lī jaa.e

ret hai sūraj hai vus.at hai tanhā.ī

lekin naañ is dil kī ḳhām-ḳhayālī jaa.e

ā.ankhoñ meñ bhar kar is dasht kī hairānī

vahshat kī umda tasvīr banā lī jaa.e

aap ne pahle bhī to mujh ko dekhā hogā!

aap ke muñh se aap kī baat churā lī jaa.e

sochoñ meñ girdāb se paḌne lag jaa.eñ

ā.ankhoñ se phir aaTh pahar na laalī jaa.e

dil-āzārī kī miTTī se īstāda ghar

un be-faiz daroñ tak kaun savālī jaa.e

us ke dhyan ki dil mein pyas jaga li jae

ek bhi sham na phir us ke nam se KHali jae

aaankhon mein kajal ki parat jama li jae

sakhiyon se yun prit ki jot chhupa li jae

ret hai suraj hai wusat hai tanhai

lekin nan is dil ki KHam-KHayali jae

aaankhon mein bhar kar is dasht ki hairani

wahshat ki umda taswir bana li jae

aap ne pahle bhi to mujh ko dekha hoga!

aap ke munh se aap ki baat chura li jae

sochon mein girdab se paDne lag jaen

aaankhon se phir aaTh pahar na lali jae

dil-azari ki miTTi se istada ghar

un be-faiz daron tak kaun sawali jae