use dil se bhula dena zaruri ho gaya hai

use dil se bhulā denā zarūrī ho gayā hai

ye jhagḌā hī miTā denā zarūrī ho gayā hai

lahū barfāb kar degī thakan yaksāniyat kī

so kuchh fitne jagā denā zarūrī ho gayā hai

girā de ghar kī dīvāreñ na shorīda-sarī meñ

havā ko rāsta denā zarūrī ho gayā hai

bahut shab ke havā-ḳhvāhoñ ko ab khulne lage haiñ

diyoñ kī lau ghaTā denā zarūrī ho gayā hai

bharam jaa.e ki jaa.e raah par aa.e na aa.e

use sab kuchh batā denā zarūrī ho gayā hai

maiñ kahtā huuñ ki jaañ hāzir kiye detā huuñ lekin

vo kahte haiñ anā denā zarūrī ho gayā hai

ye sar shānoñ pe ab ik bojh kī sūrat hai 'ālī'

sar-e-maqtal sadā denā zarūrī ho gayā hai

use dil se bhula dena zaruri ho gaya hai

ye jhagDa hi miTa dena zaruri ho gaya hai

lahu barfab kar degi thakan yaksaniyat ki

so kuchh fitne jaga dena zaruri ho gaya hai

gira de ghar ki diwaren na shorida-sari mein

hawa ko rasta dena zaruri ho gaya hai

bahut shab ke hawa-KHwahon ko ab khulne lage hain

diyon ki lau ghaTa dena zaruri ho gaya hai

bharam jae ki jae rah par aae na aae

use sab kuchh bata dena zaruri ho gaya hai

main kahta hun ki jaan hazir kiye deta hun lekin

wo kahte hain ana dena zaruri ho gaya hai

ye sar shanon pe ab ek bojh ki surat hai 'ali'

sar-e-maqtal sada dena zaruri ho gaya hai