usi ne sath diya zindagi ki rahon mein

usī ne saath diyā zindagī kī rāhoñ meñ

vo ik charāġh jo jaltā rahā nigāhoñ meñ

shamīm-e-gul se subuk-tar kiran se nāzuk-tar

koī latīf sī shai aa ga.ī hai bāhoñ meñ

ye kis kī hashr-ḳhirāmī kī baat uTThī hai

hamārā naam pukārā gayā gavāhoñ meñ

ḳhabar na thī ki vahī apnī yuuñ ḳhabar leñge

shumār karte the ham jin ko ḳhair-ḳhvāhoñ meñ

abhī haiñ raakh meñ chingāriyāñ dabī lekin

mazā kahāñ hai vo pahlā sā ab kī chāhūñ meñ

hamīñ ne ziist ke har ruup ko sañvārā hai

luTā ke raushani-e-tab.a jalva-gāhoñ meñ

ragoñ meñ jaise ravāñ hai lahū 'tamannā.ī'

kisī kī mauj-e-karam hai mire gunāhoñ meñ

usi ne sath diya zindagi ki rahon mein

wo ek charagh jo jalta raha nigahon mein

shamim-e-gul se subuk-tar kiran se nazuk-tar

koi latif si shai aa gai hai bahon mein

ye kis ki hashr-KHirami ki baat uTThi hai

hamara nam pukara gaya gawahon mein

KHabar na thi ki wahi apni yun KHabar lenge

shumar karte the hum jin ko KHair-KHwahon mein

abhi hain rakh mein chingariyan dabi lekin

maza kahan hai wo pahla sa ab ki chahun mein

hamin ne zist ke har rup ko sanwara hai

luTa ke raushani-e-taba jalwa-gahon mein

ragon mein jaise rawan hai lahu 'tamannai'

kisi ki mauj-e-karam hai mere gunahon mein