wafa ke bab mein apna misaliya ho jaun

vafā ke baab meñ apnā misāliyā ho jā.ūñ

tire firāq se pahle hī maiñ judā ho jā.ūñ

maiñ apne-āp ko tere sabab se jāntā huuñ

tire yaqīn se haT kar to vāhima ho jā.ūñ

ta.alluqāt ke barzaḳh meñ ain-mumkin hai

zarā sā dukh vo mujhe de to maiñ tirā ho jā.ūñ

abhī maiñ ḳhush huuñ to ġhāfil na jaan ḳhud se mujhe

na jaane kaun sī laġhzish pe maiñ ḳhafā ho jā.ūñ

abhī to raah meñ haa.il hai aarzū kī fasīl

zarā ye ishq sivā ho to jā-ba-jā ho jā.ūñ

abhī to vaqt tanaffus ke saath chaltā hai

zarā Thahar ki maiñ is jism se rihā ho jā.ūñ

abhī to maiñ bhī tirī justujū meñ shāmil huuñ

qarīb hai ki tamannā se māvarā ho jā.ūñ

ḳhamoshiyāñ haiñ añdherā hai be-yaqīnī hai

na ho jo yaad bhī terī to maiñ ḳhalā ho jā.ūñ

kisī se mil ke bichhaḌnā baḌī aziyyat hai

to kyā maiñ ahd-e-tamanā kā fāsla ho jā.ūñ

tire ḳhayāl kī sūrat-garī kā shauq liye

maiñ ḳhvāb ho to gayā huuñ ab aur kyā ho jā.ūñ?

ye harf o saut kā rishta hai zindagī kī dalīl

ḳhudā vo din na dikhā.e ki be-sadā ho jā.ūñ

vo jis ne mujh ko tire hijr meñ bahāl rakhā

tū aa gayā hai to kyā us se bevafā ho jā.ūñ

wafa ke bab mein apna misaliya ho jaun

tere firaq se pahle hi main juda ho jaun

main apne-ap ko tere sabab se jaanta hun

tere yaqin se haT kar to wahima ho jaun

talluqat ke barzaKH mein ain-mumkin hai

zara sa dukh wo mujhe de to main tera ho jaun

abhi main KHush hun to ghafil na jaan KHud se mujhe

na jaane kaun si laghzish pe main KHafa ho jaun

abhi to rah mein hail hai aarzu ki fasil

zara ye ishq siwa ho to ja-ba-ja ho jaun

abhi to waqt tanaffus ke sath chalta hai

zara Thahar ki main is jism se riha ho jaun

abhi to main bhi teri justuju mein shamil hun

qarib hai ki tamanna se mawara ho jaun

KHamoshiyan hain andhera hai be-yaqini hai

na ho jo yaad bhi teri to main KHala ho jaun

kisi se mil ke bichhaDna baDi aziyyat hai

to kya main ahd-e-tamana ka fasla ho jaun

tere KHayal ki surat-gari ka shauq liye

main KHwab ho to gaya hun ab aur kya ho jaun?

ye harf o saut ka rishta hai zindagi ki dalil

KHuda wo din na dikhae ki be-sada ho jaun

wo jis ne mujh ko tere hijr mein bahaal rakha

tu aa gaya hai to kya us se bewafa ho jaun