wo dil bhi jalate hain rakh dete hain marham bhi

vo dil bhī jalāte haiñ rakh dete haiñ marham bhī

kyā turfa tabī.at hai shola bhī haiñ shabnam bhī

ḳhāmosh na thā dil bhī ḳhvābīda na the ham bhī

tanhā to nahīñ guzrā tanhā.ī kā aalam bhī

chhalkā hai kahīñ shīsha Dhalkā hai kahīñ aañsū

gulshan kī havāoñ meñ naġhma bhī hai mātam bhī

har dil ko lubhātā hai ġham terī mohabbat kā

terī hī tarah zālim dilkash hai tirā ġham bhī

inkār-e-mohabbat ko tauhīn samajhte haiñ

iz.hār-e-mohabbat par ho jaate haiñ barham bhī

tum ruk ke nahīñ milte ham jhuk ke nahīñ milte

mālūm ye hotā hai kuchh tum bhī ho kuchh ham bhī

paa.ī na 'shamīm' apne saaqī kī nazar yaksāñ

har aan badaltā hai mai-ḳhāne kā mausam bhī

wo dil bhi jalate hain rakh dete hain marham bhi

kya turfa tabiat hai shola bhi hain shabnam bhi

KHamosh na tha dil bhi KHwabida na the hum bhi

tanha to nahin guzra tanhai ka aalam bhi

chhalka hai kahin shisha Dhalka hai kahin aansu

gulshan ki hawaon mein naghma bhi hai matam bhi

har dil ko lubhata hai gham teri mohabbat ka

teri hi tarah zalim dilkash hai tera gham bhi

inkar-e-mohabbat ko tauhin samajhte hain

izhaar-e-mohabbat par ho jate hain barham bhi

tum ruk ke nahin milte hum jhuk ke nahin milte

malum ye hota hai kuchh tum bhi ho kuchh hum bhi

pai na 'shamim' apne saqi ki nazar yaksan

har aan badalta hai mai-KHane ka mausam bhi