wo samne jab aa jate hain sakte ka sa aalam hota hai

vo sāmne jab aa jaate haiñ sakte kā sā aalam hotā hai

us dil kī tabāhī kyā kahiye amrit bhī jise sam hotā hai

dete haiñ usī ko jām-e-tarab jo jur.a-kash-e-ġham hotā hai

kab bāġh-e-jahāñ haiñ ḳhanda-e-gul be-girya-e-shabnam hotā hai

jab valvala sādiq hotā hai jab azm musammam hotā hai

takmīl kā sāmāñ ġhaib se ḳhud us vaqt farāham hotā hai

anjām-e-vafā bhī dekh liyā ab kis liye sar ḳham hotā hai

nāzuk hai mizāj-e-husn bahut sajde se bhī barham hotā hai

ye aag dahaktī hai jitnī utnā hī dhuāñ kam detī hai

ehsās-e-sitam baḌh jaatā hai to shor-e-fuġhāñ kam hotā hai

rag rag meñ nizām-e-fitrat kī raqsāñ hai mohabbat kī bijlī

ho laakh tazād azdād meñ bhī ik rābta bāham hotā hai

mil-jul ke ba-rañg-e-rañg-e-shīr-o-shakar donoñ ke nikharte haiñ jauhar

dariyāoñ ke sañgam se baḌh kar tahzīboñ kā sañgam hotā hai

tārāj nasheman khel sahī sayyād magar itnā sun le

jab ishq kī duniyā luTtī hai ḳhud husn kā mātam hotā hai

dīvānoñ ke jeb-o-dāman kā uḌtā hai fazā meñ jo TukḌā

mustaqbil-e-millat ke haq meñ iqbāl kā parcham hotā hai

mansūr jo hotā ahl-e-nazar to dāva-e-bātil kyuuñ kartā

us kī to zabāñ khultī hī nahīñ jo raaz kā mahram hotā hai

tā-chand 'suhail' afsurda-e-ġham kyā yaad nahīñ tārīḳh-e-haram

īmāñ ke jahāñ paḌte haiñ qadam paidā vahīñ zamzam hotā hai

wo samne jab aa jate hain sakte ka sa aalam hota hai

us dil ki tabahi kya kahiye amrit bhi jise sam hota hai

dete hain usi ko jam-e-tarab jo jura-kash-e-gham hota hai

kab bagh-e-jahan hain KHanda-e-gul be-girya-e-shabnam hota hai

jab walwala sadiq hota hai jab azm musammam hota hai

takmil ka saman ghaib se KHud us waqt faraham hota hai

anjam-e-wafa bhi dekh liya ab kis liye sar KHam hota hai

nazuk hai mizaj-e-husn bahut sajde se bhi barham hota hai

ye aag dahakti hai jitni utna hi dhuan kam deti hai

ehsas-e-sitam baDh jata hai to shor-e-fughan kam hota hai

rag rag mein nizam-e-fitrat ki raqsan hai mohabbat ki bijli

ho lakh tazad azdad mein bhi ek rabta baham hota hai

mil-jul ke ba-rang-e-rang-e-shir-o-shakar donon ke nikharte hain jauhar

dariyaon ke sangam se baDh kar tahzibon ka sangam hota hai

taraj nasheman khel sahi sayyaad magar itna sun le

jab ishq ki duniya luTti hai KHud husn ka matam hota hai

diwanon ke jeb-o-daman ka uDta hai faza mein jo TukDa

mustaqbil-e-millat ke haq mein iqbaal ka parcham hota hai

mansur jo hota ahl-e-nazar to dawa-e-baatil kyun karta

us ki to zaban khulti hi nahin jo raaz ka mahram hota hai

ta-chand 'suhail' afsurda-e-gham kya yaad nahin tariKH-e-haram

iman ke jahan paDte hain qadam paida wahin zamzam hota hai