wo taDap jae ishaara koi aisa dena

vo taḌap jaa.e ishāra koī aisā denā

us ko ḳhat likhnā to merā bhī havāla denā

apnī tasvīr banāoge to hogā ehsās

kitnā dushvār hai ḳhud ko koī chehrā denā

is qayāmat kī jab us shaḳhs ko āñkheñ dī haiñ

ai ḳhudā ḳhvāb bhī denā to sunahrā denā

apnī tārīf to mahbūb kī kamzorī hai

ab ke milnā to use ek qasīda denā

hai yahī rasm baḌe shahroñ meñ vaqt-e-ruḳhsat

haath kaafī hai havā meñ yahāñ lahrā denā

in ko kyā qile ke andar kī fazāoñ kā patā

ye nigahbān haiñ in ko to hai pahrā denā

patte patte pe na.ī rut ke ye likh deñ 'az.har'

dhuup meñ jalte hue jismoñ ko saayā denā

wo taDap jae ishaara koi aisa dena

us ko KHat likhna to mera bhi hawala dena

apni taswir banaoge to hoga ehsas

kitna dushwar hai KHud ko koi chehra dena

is qayamat ki jab us shaKHs ko aankhen di hain

ai KHuda KHwab bhi dena to sunahra dena

apni tarif to mahbub ki kamzori hai

ab ke milna to use ek qasida dena

hai yahi rasm baDe shahron mein waqt-e-ruKHsat

hath kafi hai hawa mein yahan lahra dena

in ko kya qile ke andar ki fazaon ka pata

ye nigahban hain in ko to hai pahra dena

patte patte pe nai rut ke ye likh den 'azhar'

dhup mein jalte hue jismon ko saya dena