ya rab ye jahan-e-guzaran KHub hai lekin

yā rab ye jahān-e-guzarāñ ḳhuub hai lekin

kyuuñ ḳhvār haiñ mardān-e-safā-kesh o hunar-mand

go is kī ḳhudā.ī meñ mahājan kā bhī hai haath

duniyā to samajhtī hai farañgī ko ḳhudāvand

tū barg-e-gayā hai na vahī ahl-e-ḳhirad rā

o kisht-e-gul-o-lāla ba-baḳhshad ba-ḳhare chand

hāzir haiñ kalīsā meñ kabāb o mai-e-gulgūñ

masjid meñ dharā kyā hai ba-juz mauiza o pand

ahkām tire haq haiñ magar apne mufassir

tāvīl se qur.āñ ko banā sakte haiñ pāzand

firdaus jo terā hai kisī ne nahīñ dekhā

afrañg kā har qarya hai firdaus kī mānind

muddat se hai āvāra-e-aflāk mirā fikr

kar de ise ab chāñd ke ġhāroñ meñ nazar-band

fitrat ne mujhe baḳhshe haiñ jauhar malākūtī

ḳhākī huuñ magar ḳhaak se rakhtā nahīñ paivand

darvesh-e-ḳhudā-mast na sharqī hai na ġharbī

ghar merā na dillī na safāhāñ na samarqand

kahtā huuñ vahī baat samajhtā huuñ jise haq

ne ābla-e-masjid huuñ na tahzīb kā farzand

apne bhī ḳhafā mujh se haiñ begāne bhī nā-ḳhush

maiñ zahr-e-halāhal ko kabhī kah na sakā qand

mushkil hai ik banda-e-haq-bīn-o-haq-andesh

ḳhāshāk ke tode ko kahe koh-e-damāvand

huuñ ātish-e-namrūd ke sho.aloñ meñ bhī ḳhāmosh

maiñ banda-e-momin huuñ nahīñ dāna-e-aspand

pur-soz nazar-bāz o niko-bīn o kam aarzū

āzād o giraftār o tahī kiisa o ḳhursand

har haal meñ merā dil-e-be-qaid hai ḳhurram

kyā chhīnegā ġhunche se koī zauq-e-shakar-ḳhand

chup rah na sakā hazrat-e-yazdāñ meñ bhī 'iqbāl'

kartā koī is banda-e-gustāḳh kā muñh band

ya rab ye jahan-e-guzaran KHub hai lekin

kyun KHwar hain mardan-e-safa-kesh o hunar-mand

go is ki KHudai mein mahajan ka bhi hai hath

duniya to samajhti hai farangi ko KHudawand

tu barg-e-gaya hai na wahi ahl-e-KHirad ra

o kisht-e-gul-o-lala ba-baKHshad ba-KHare chand

hazir hain kalisa mein kabab o mai-e-gulgun

masjid mein dhara kya hai ba-juz mauiza o pand

ahkaam tere haq hain magar apne mufassir

tawil se quran ko bana sakte hain pazand

firdaus jo tera hai kisi ne nahin dekha

afrang ka har qarya hai firdaus ki manind

muddat se hai aawara-e-aflak mera fikr

kar de ise ab chand ke ghaaron mein nazar-band

fitrat ne mujhe baKHshe hain jauhar malakuti

KHaki hun magar KHak se rakhta nahin paiwand

darwesh-e-KHuda-mast na sharqi hai na gharbi

ghar mera na dilli na safahan na samarqand

kahta hun wahi baat samajhta hun jise haq

ne aabla-e-masjid hun na tahzib ka farzand

apne bhi KHafa mujh se hain begane bhi na-KHush

main zahr-e-halahal ko kabhi kah na saka qand

mushkil hai ek banda-e-haq-bin-o-haq-andesh

KHashak ke tode ko kahe koh-e-damawand

hun aatish-e-namrud ke shoalon mein bhi KHamosh

main banda-e-momin hun nahin dana-e-aspand

pur-soz nazar-baz o niko-bin o kam aarzu

aazad o giraftar o tahi kisa o KHursand

har haal mein mera dil-e-be-qaid hai KHurram

kya chhinega ghunche se koi zauq-e-shakar-KHand

chup rah na saka hazrat-e-yazdan mein bhi 'iqbaal'

karta koi is banda-e-gustaKH ka munh band