ye bala dil pe kab aai mujhe malum nahin

ye balā dil pe kab aa.ī mujhe ma.alūm nahīñ

dard ab kaisā hai bhaa.ī mujhe ma.alūm nahīñ

apne jalne kā hamesha se tamāshā.ī huuñ

aag ye kis ne lagā.ī mujhe ma.alūm nahīñ

hālat-e-hijr meñ huuñ ye to ḳhabar hai mujh ko

par ye kis kī hai judā.ī mujhe ma.alūm nahīñ

haañ bahut duur bahut duur vo rahtā hai kahīñ

kaise detā hai dikhā.ī mujhe ma.alūm nahīñ

jism se mere ab us kī hī mahak aatī hai

kab vo yuuñ mujh meñ samā.ī mujhe ma.alūm nahīñ

aatī jaatī hai vo ab saañs kī sūrat mujh meñ

kab ga.ī aur kab aa.ī mujhe ma.alūm nahīñ

maiñ to kah aaya ḳhamoshī kī zabāñ se sab kuchh

kyā diyā us ko sunā.ī mujhe ma.alūm nahīñ

muddat-e-qaid kā iḳhfā hai yahāñ kā dastūr

yaanī kab hogī rihā.ī mujhe ma.alūm nahīñ

ye bala dil pe kab aai mujhe malum nahin

dard ab kaisa hai bhai mujhe malum nahin

apne jalne ka hamesha se tamashai hun

aag ye kis ne lagai mujhe malum nahin

haalat-e-hijr mein hun ye to KHabar hai mujh ko

par ye kis ki hai judai mujhe malum nahin

han bahut dur bahut dur wo rahta hai kahin

kaise deta hai dikhai mujhe malum nahin

jism se mere ab us ki hi mahak aati hai

kab wo yun mujh mein samai mujhe malum nahin

aati jati hai wo ab sans ki surat mujh mein

kab gai aur kab aai mujhe malum nahin

main to kah aaya KHamoshi ki zaban se sab kuchh

kya diya us ko sunai mujhe malum nahin

muddat-e-qaid ka iKHfa hai yahan ka dastur

yani kab hogi rihai mujhe malum nahin