ye mai-kash kaun ba-sad laghzish-e-mastana aata hai

ye mai-kash kaun bā-sad laġhzish-e-mastāna aatā hai

ishāre hote haiñ vo raunaq-e-mai-ḳhāna aatā hai

tumhārī bazm bhī kyā bazm hai ādāb haiñ kaise

vahī maqbūl hotā hai jo gustāḳhāna aatā hai

kahānī apnī apnī ahl-e-mahfil jab sunāte haiñ

mujhe bhī yaad ik bhūlā huā afsāna aatā hai

duā terī tire mantar bhalā maqbūl kyā hoñge

badī dil meñ liye sū-e-ibādat-ḳhāna aatā hai

havā-e-tāza abr-e-tar fuzūñ josh-e-numū lekin

nasīb-e-dushmanāñ hai khet meñ jo daana aatā hai

har ik Thokar pe hai ai 'amn' laġhzish kā gumāñ mujh ko

har ik patthar nazar sañg-e-dar-e-mai-ḳhāna aatā hai

ye mai-kash kaun ba-sad laghzish-e-mastana aata hai

ishaare hote hain wo raunaq-e-mai-KHana aata hai

tumhaari bazm bhi kya bazm hai aadab hain kaise

wahi maqbul hota hai jo gustaKHana aata hai

kahani apni apni ahl-e-mahfil jab sunate hain

mujhe bhi yaad ek bhula hua afsana aata hai

dua teri tere mantar bhala maqbul kya honge

badi dil mein liye su-e-ibaadat-KHana aata hai

hawa-e-taza abr-e-tar fuzun josh-e-numu lekin

nasib-e-dushmanan hai khet mein jo dana aata hai

har ek Thokar pe hai ai 'amn' laghzish ka guman mujh ko

har ek patthar nazar sang-e-dar-e-mai-KHana aata hai