zara soch kar ai jafa karne wale

zarā soch kar ai jafā karne vaale

kahīñ jī na chhoḌeñ vafā karne vaale

gila kuchh nahīñ mujh ko vaa.iz se lekin

ye kaun aap kā tazkira karne vaale

ghamanD un ko allāh re itnā jafā kā

to kyā mar ga.e ab vafā karne vaale

baḌe be-muravvat baḌe bevafā ho

hamesha bahāna nayā karne vaale

galī meñ tirī sar-ba-kaf ho ke aa.eñ

kahāñ haiñ mirā sāmnā karne vaale

vo bebāk chitvan yahī kah rahī hai

kisī se nahīñ ham vafā karne vaale

shahīdān-e-ulfat na ḳhush hoñ taḌap kar

vo is par nahīñ e'tinā karne vaale

ye kahtā hai parvāne kā jal ke marnā

vafā karte haiñ yuuñ vafā karne vaale

samajhte haiñ āsāñ abhī un kā milnā

bahut duur haiñ hausla karne vaale

naqāb un kī jis vaqt sarkegī ruḳh se

qayāmat kareñge hayā karne vaale

dam-e-naz.a āḳhir nikal aa.e aañsū

kahāñ jā ke chauke vafā karne vaale

zabāñ par mirī rāz-e-dil ab to aayā

mirī sharm rakh le hayā karne vaale

davā se to bīmār kuchh aur uljhā

maraz hī na samjhe davā karne vaale

ḳhamoshī mirī laash kī kah rahī hai

jafā sahte haiñ yuuñ vafā karne vaale

gadā kaun betāb sā is galī meñ

haiñ yuuñ to bahut se sadā karne vaale

zara soch kar ai jafa karne wale

kahin ji na chhoDen wafa karne wale

gila kuchh nahin mujh ko waiz se lekin

ye kaun aap ka tazkira karne wale

ghamanD un ko allah re itna jafa ka

to kya mar gae ab wafa karne wale

baDe be-murawwat baDe bewafa ho

hamesha bahana naya karne wale

gali mein teri sar-ba-kaf ho ke aaen

kahan hain mera samna karne wale

wo bebak chitwan yahi kah rahi hai

kisi se nahin hum wafa karne wale

shahidan-e-ulfat na KHush hon taDap kar

wo is par nahin e'tina karne wale

ye kahta hai parwane ka jal ke marna

wafa karte hain yun wafa karne wale

samajhte hain aasan abhi un ka milna

bahut dur hain hausla karne wale

naqab un ki jis waqt sarkegi ruKH se

qayamat karenge haya karne wale

dam-e-naza aaKHir nikal aae aansu

kahan ja ke chauke wafa karne wale

zaban par meri raaz-e-dil ab to aaya

meri sharm rakh le haya karne wale

dawa se to bimar kuchh aur uljha

maraz hi na samjhe dawa karne wale

KHamoshi meri lash ki kah rahi hai

jafa sahte hain yun wafa karne wale

gada kaun betab sa is gali mein

hain yun to bahut se sada karne wale