zoam-e-hasti mere idrak se bandha gaya hai

zo.am-e-hastī mire idrāk se bāñdhā gayā hai

aur badan turra-e-pechāk se bāñdhā gayā hai

ek aañsū tirī poshāk se bāñdhā gayā hai

yā sitārā koī aflāk se bāñdhā gayā hai

ishq ko gesū-e-pechāk se bāñdhā gayā hai

aur phir gardish-e-aflāk se bāñdhā gayā hai

ḳhaak uḌātā huuñ maiñ tā-umr nibhāne ke liye

ek rishta jo mirā ḳhaak se bāñdhā gayā hai

TuuTe paḌte haiñ tamāshe ko yahāñ par naḳhchīr

aaj sayyād ko fitrāk se bāñdhā gayā hai

kisht-e-vahshat ho jise dekhnī aa.e dekhe

har bagūla ḳhas-o-ḳhāshāk se bāñdhā gayā hai

phir vahī harf-e-tamannā hai vahī sā.at-e-dard

phir hameñ dīda-e-namnāk se bāñdhā gayā hai

ab kisī kūza-garī kī nahīñ hājat ki mujhe

tā fanā ek isī chaak se bāñdhā gayā hai

ham gunahgāroñ kī hai āḳhirī ummīd vahī

ahd ik jo shah-e-laulāk se bāñdhā gayā hai

kujā ye shoḳh-adā duniyā kujā maiñ 'irfān'

mard-e-sāda zan-e-bebāk se bāñdhā gayā hai

zoam-e-hasti mere idrak se bandha gaya hai

aur badan turra-e-pechaak se bandha gaya hai

ek aansu teri poshak se bandha gaya hai

ya sitara koi aflak se bandha gaya hai

ishq ko gesu-e-pechaak se bandha gaya hai

aur phir gardish-e-aflak se bandha gaya hai

KHak uData hun main ta-umr nibhane ke liye

ek rishta jo mera KHak se bandha gaya hai

TuTe paDte hain tamashe ko yahan par naKHchir

aaj sayyaad ko fitrak se bandha gaya hai

kisht-e-wahshat ho jise dekhni aae dekhe

har bagula KHas-o-KHashak se bandha gaya hai

phir wahi harf-e-tamanna hai wahi saat-e-dard

phir hamein dida-e-namnak se bandha gaya hai

ab kisi kuza-gari ki nahin hajat ki mujhe

ta fana ek isi chaak se bandha gaya hai

hum gunahgaron ki hai aaKHiri ummid wahi

ahd ek jo shah-e-laulak se bandha gaya hai

kuja ye shoKH-ada duniya kuja main 'irfan'

mard-e-sada zan-e-bebak se bandha gaya hai