dasht-e-wigha mein nur-e-KHuda ka zuhur hai

dasht-e-viġha meñ nūr-e-ḳhudā kā zuhūr hai

dasht-e-viġhā meñ nūr-e-ḳhudā kā zuhūr hai

zarroñ meñ raushnī-e-tajallī-e-tūr hai

ik āftāb-e-ruḳh kī ziyā duur duur hai

kosoñ zamīn aks se dariyā-e-nūr hai

allāh-re husn tabqa-e-ambar-sarisht kā

maidān-e-karbalā hai namūna bahisht kā

hairāñ zamīñ ke nuur se hai charḳh-e-lājvard

mānind-e-kahrubā hai ruḳh-e-āftāb-e-zard

hai rū-kash-e-fazā-e-iram vādi-e-nabard

uThtā hai ḳhaak se tataq-e-nūr jā-e-gard

hairat se hāmilān-e-falak un ko takte haiñ

zarre nahīñ zamīñ pe sitāre chamakte haiñ

hai āb-e-nahr sūrat-e-ā.īna jalva-gar

tābāñ hai misl-e-chashma-e-ḳhurshīd har bhañvar

lahreñ bisān-e-barq chamaktī haiñ sar-ba-sar

paanī pe machhliyoñ kī Thahartī nahīñ nazar

ye āb-o-tāb hai ki guhar aab aab haiñ

dariyā to āsmāñ haiñ sitāre hubāb haiñ

partav-fagan huā jo ruḳh-e-qibla-e-anām

mash.hūr ho ga.ī vo zamīñ arsh-ehtishām

aur sañg-reze durr-e-najaf ban ga.e tamām

sahrā ko mil gayā sharaf-e-vādī-assalām

kaabe se aur najaf se bhī izzat sivā huī

ḳhaak us zamīn-e-pāk kī ḳhāk-e-shifā huī

phailā jo nūr-e-mahr-e-imāmat dam-e-zavāl

zarroñ se vaañ ke aañkh milānā huā muhāl

saare nihāl faiz-e-qadam se hue nihāl

aḳhtar bane jo phuul to shāḳheñ banīñ hilāl

patte tamām ā.īna-e-nūr ho ga.e

sahrā ke naḳhl sab shajar-e-tūr ho ga.e

ġhul thā zahe husain kī shaukat zahe vaqār

goyā khaḌe haiñ jañg ko mahbūb-e-kirdgār

ruḳh se ayaañ hai dabdaba-e-shāh-e-zul-fiqār

hai nūr-e-haq jabīn-e-munavvar se āshkār

kyūñkar chhupe na māh-e-do-hafta hijāb se

chauda tabaq meñ nuur hai us āftāb se

ye rū-e-raushan aur ye gesu-e-mushk-e-fām

yaañ shaam meñ to sub.h hai aur sub.h meñ hai shaam

haale meñ yuuñ nazar nahīñ aatā hai mah tamām

qudarat ḳhudā kī nuur kā zulmat meñ hai maqām

zulfoñ meñ jalva-gar nahīñ chehra janāb kā

hai nisf shab meñ aaj zuhūr āftāb kā

qurbāñ kamān-e-abrū-e-maulā pe jaan o dil

gar māh-e-nau kaheñ to hai tashbīh mubtazil

chashm-e-ġhazāl-e-dasht-e-ḳhutan chashm se ḳhajil

dekhā jise karam se ḳhatā.eñ huiiñ bahil

putlī bisān-e-qibla-numā be-qarār hai

giryāñ haiñ vo ye gardish-e-lail o nahār hai

ruḳhsār haiñ ziyā meñ qamar se ziyāda-tar

jin par Thahar sakī na kabhī shams kī nazar

rīsh-e-moḳhazzab aur ye ruḳh-e-shāh-e-bahr o bar

paidā haiñ saaf ma.anī-e-val-lailo-o-val-qamar

qur.ān se ayaañ hai buzurgī imaam kī

khaa.ī qasam ḳhudā ne isī sub.h o shaam kī

kis muñh se kījiye lab-e-jān-baḳhsh kā bayāñ

chūsī jinhoñ ne ahmad muḳhtār kī zabāñ

kyā durr-e-āb-dār haiñ is durj meñ nihāñ

goyā ki motiyoñ kā ḳhazāna hai ye dahāñ

zarre zamīñ pe aks se saare chamak ga.e

jis vaqt ye khile to sitār chamak ga.e

sham-e-harīm-e-lam-yazalī thā gulū-e-shāh

tārīk shab meñ jaise huvaidā ho nūr-e-māh

ai charḳh-e-be-madār ye kaisā sitam hai aah

shamshīr-e-shimr aur mohammad kī bosa-gāh

jis par rasūl hoñToñ ko malte hoñ pyaar se

kaT jaa.e karbalā maiñ vo ḳhanjar kī dhaar se

manzūr yaañ thī mad.h-e-gulū-e-shah-e-umam

yaad aa ga.ī magar ye hadīs-e-ġham-o-alam

masjid meñ jalva-gar the rasūl-e-falak-hasham

malte the zikr-e-haq meñ lab-e-pāk dam-ba-dam

raushan the bām-o-dar ruḳh-e-raushan ke nuur se

ā.īna ban ga.ī thī zamīñ tan ke nuur se

thā jo sutūñ ki rukn-e-risālat kā takiya-gāh

kursī bhī us kī pusht kī thī DhūñDhtī panāh

thā jis hasīr par vo do aalam kā bādshāh

hasrat se arsh kartā thā us farsh par nigāh

auj-e-zamīñ bahisht-e-barīñ se do-chand thā

mimbar kā nuh falak se bhī paaya buland thā

as.hāb-e-ḳhās gird the anjum kī tarah sab

tābāñ thā biich meñ vo mah-e-hāshmī-laqab

sar par malak-sifāt magas-rāañ the do arab

jibrīl tah kiye hue the zānu-e-adab

ḳhādim bilāl-o-qumbar-e-gardūñ-asās thā

nālain is ke paas asā us ke paas thā

gesū the vo mufassir-e-vallail-izā-sajā

ruḳh se ayaañ the ma.anī-e-vashshams-o-va-zzuhā

vo rīsh-e-pāk aur ruḳh-e-sardār-e-ambiyā

goyā dharā thā rehl pe qur.āñ khulā huā

oḌhe siyah abā jo vo ālam-panāh thā

kaaba kā saaf hājiyoñ ko ishtibāh thā

pahlū meñ bādshāh ke thā jalva-gar vazīr

sardār-e-dīñ alī-e-valī ḳhalq kā amiir

donoñ jahāñ meñ koī na donoñ kā thā nazīr

ahmad the āftāb to haidar mah-e-munīr

zāhir meñ ek nuur kā do jā zuhūr thā

gar ġhaur kījiye to vahī ek nuur thā

masrūf-e-vāz-o-pand the sultān-e-mashriqain

jo ghar se nikle khelte zohrā ke nuur ain

naanā baġhair donoñ navāsoñ ko thā na chain

baḌh jaate the hasan kabhī aage kabhī husain

kahte the dekheñ kaun qadam jald uThātā hai

naanā ke paas kaun bhalā pahle jaatā hai

vo gore gore chehroñ pe zulfeñ idhar udhar

aḳhtar se vo chamakte hue kaan ke guhar

rashk-e-hilāl tauq gale ġhairat-e-qamar

haikal pe naqsh naam ḳhudā-e-jalīl ke

tāvīz gardanoñ pe par-e-jibrīl ke

masjid meñ aa.e hañste hue jab vo gul-badan

ḳhushbū se sehan-e-masjid-e-jāme banā chaman

taslīm ko husain se pahle jhuke hasan

ḳhush ho ke muskurāne lage sarvar-e-zaman

baḌh baḌh ke ḳham salām ko chhoTe baḌe hue

baiThe rahe rasūl malak uTh khaḌe hue

beToñ ko thā alī kā ishāra ki baiTh jaao

lāzim nahīñ ki vaaz meñ naanā ko tum satāo

phailā ke haath bole mohammad ki aao aao

shabbīr ne kahā hameñ pahle gale lagāo

bhaa.ī hasan jo aap kī godī meñ aa.eñ ge

ham tum se naanā jaan abhī ruuTh jaa.eñ ge

bole hasan ki vaah hameñ aur kareñ na pyaar

iqrār ke chuke haiñ shahanshāh-e-nām-dār

bole ba-chashm-e-nam ye husain-e-falak-vaqār

dekheñ to kaun kāñdhe pe hotā hai ab savār

sab se sivā jo haiñ so hamīñ un ke pyāre haiñ

aage na baḌhiye aap ki naanā hamāre haiñ

bhaa.ī se tab kahā ye hasan ne ba-iltifāt

be-vaj.h ham se rūThe ho tum ai niko-sifāt

naanā hamāre kyā nahīñ sultān-e-kā.enāt

hotī hai nāgavār tumheñ to zarā sī baat

ġhussa na itnā chāhiye ḳhush-ḳhū ke vāste

machle the yuuñ hī bachcha-e-āhū ke vāste

ye sun ke muñh alī kā lage dekhne rasūl

hañs kar kahā ye donoñ haiñ mere chaman ke phuul

maiñ chāhtā huuñ ek kī ḳhātir na ho malūl

ro.eñge ye to ghar se nikal aa.egī butūl

hove na rañj mere kisī nūr-e-ain ko

tum lo hasan ko god meñ maiñ luuñ husain ko

shabbar se phir ishāra kiyā ho ke be-qarār

ġhussa na khaao pahle tumhīñ ko kareñge pyaar

phir bole dekh kar sū-e-shabbīr-e-nām-dār

aa ai husain aa tirī bātoñ ke maiñ nisār

chhātī se ham lagā.eñge jaan apnī jaan kar

dekheñ to pahle kaun lipaTtā hai aan kar

dauḌe ye baat sun ke barābar vo ḳhush-sayar

paas aa.e āftāb-e-risālat ke do qamar

lipTe husain hañs ke idhar aur hasan udhar

the paañv zānūoñ pe to bālā-e-dosh sar

naanā ke saath pyaar meñ donoñ kā saath thā

gardan meñ ek un kā aur un kā haath thā

phir phir ke dekhte the shahanshāh-e-mashriqain

gah jānib-e-hasan to kabhī jānib-e-husain

baiThe jo zānūoñ pe vo zehrā ke nūr-e-ain

thā tan ko lutf qalb ko rāhat jigar ko chain

jhuk jhuk ke muñh rasūl-e-zaman chūmne lage

in kā galā to un kā dahan chūmne lage

shabbīr chāhte the ki chūmeñ mire bhī lab

par kuchh gale ke bosoñ kā khultā na thā sabab

naanā ke muñh ke paas ye laate the muñh ko jab

jhuk jhuk ke chūmte the galā sayyad-e-arab

bhaa.ī ko dekh kar jo hasan muskurāte the

ġhairat se un kī āñkhoñ meñ aañsū bhar aate the

uTThe husain zānū-e-ahmad se ḳhashm-gīñ

ġhusse se rañg zard aur āñkhoñ pe āstīñ

ruḳh par pasīna jism meñ ra.asha jabīñ pa chiiñ

pūchhā kidhar chale to ye bole kahīñ nahīñ

ghar meñ akele tevarī chaḌhā.e chale ga.e

dekhā na phir ke sar ko jhukā.e chale ga.e

baitushsharf meñ aa.e jo shabbīr-e-nām-dār

kurte ko muñh pe rakh ke lage rone zār-zār

dauḌīñ ye kah ke fāima-zehrā jigar-figār

hai hai husain kyā huā tū kyuuñ hai ashk-bār

tujh ko rulā ke ġham meñ mujhe mubtalā kiyā

qurbān ho ga.ī tujhe kis ne ḳhafā kiyā

merā kaleja phahTtā hai ai dilrubā na ro

zehrā hazār jaan se tujh pe fidā na ro

sar meñ na dard ho kahīñ ai mah-laqā na ro

bas bas na ro husain barā-e-ḳhudā na ro

merī taraf to dekho ki betāb hotī huuñ

chādar se muñh ko Dhāñp ke lo maiñ bhī rotī huuñ

tū muñh to khol ai mire shabbīr-e-ḳhush-ḳhisāl

tar ho ga.e haiñ āñsuoñ se gore gore gaal

mal mal ke pusht-e-dast se aañkh karo na laal

suljhā.ūñ aao uljhe hue gesuoñ ke baal

ghar se ga.e the saath judā ho ke aa.e ho

samjhī maiñ kuchh hasan se ḳhafā ho ke aa.e ho

tum chup raho vo ghar meñ to masjid se phir ke aa.eñ

guzrī maiñ khel se mire bachche ko kyuuñ rulā.eñ

un se na boliyo vo tumheñ laakh gar manā.eñ

lo aao jaane do tumheñ chhātī se ham lagā.eñ

vaarī agar hasan ne rulāyā burā kiyā

pūchhūñgī kyā na maiñ mire pyāre ne kyā kiyā

bole husain ham to haiñ is baat par ḳhafā

naanā ne chūme bhaa.ī ke hoñT aur mirā galā

tum ammāñ-jān muñh ko to sūñgho mire zarā

kuchh bū-e-nāgavār hai mere dahan meñ kyā

bhaa.ī ke lab se apne laboñ ko milāte haiñ

ab ham na jaa.eñ ge hameñ naanā rulāte haiñ

muñh rakh ke muñh pe bolī ye zehrā jigar-figār

bū-e-gulāb aatī hai ai mere gul-azār

chūmā agar galā to ḳhafā ho na maiñ nisār

tum ko zabāñ chūsāte the mahbūb-e-kirdgār

ye mushk meñ mahak na gul-e-yāsman meñ hai

ḳhush-bū usī dahan kī tumhāre dahan meñ hai

kahne lage husain ye maañ se ba-chashm-e-nam

kyā jaano tum hasan se hameñ chāhte haiñ kam

ye kyā unhīñ pe lutf-o-ināyat hai dam-ba-dam

mālūm ho gayā unheñ pyāre nahīñ haiñ ham

ro ro ke aaj jaan ham apnī gañvā.eñge

paanī na ab piyeñge na khāne ko khā.eñge

ye baat sun ke ho gayā zehrā kā rañg faq

bolī pisar se ro ke vo bint-e-rasūl-e-haq

sadqe ga.ī karo na kaleje ko mere shaq

hai hai ye kyā kahā mujhe hotā hai ab qalaq

merā lahū bahegā jo aañsū bahāoge

kaahe ko maañ jiyegī jo khānā na khāoge

ye kah ke oḌh lī sar-e-pur-nūr par ridā

moze pahan ke god meñ shabbīr ko liyā

dar tak ga.ī jo ghar se vo dil-band-e-mustafā

fizza ne baḌh ke būzar o salmāñ ko dī sadā

pesh-e-nabī husain ko godī meñ laatī haiñ

haT jaao sab ki fātima masjid meñ aatī haiñ

allāh-re aamad āmad-e-zehrā kā bandobast

sātoñ falak the auj-e-sharāfat se jis ke past

ahmad ke gird-o-pesh se uTThe ḳhudā-parast

insāñ to kyā malak ko na thī qudarat-e-nishast

aa.iiñ to shād-shād rasūl-e-zaman hue

ghar meñ ḳhudā ke ek jagah panj-tan hue

tāzīm-e-fātima ko uThe sayyad-ul-bashar

dekhā ki chashm-e-fātima hai āñsuoñ se tar

ġham the husain dosh pe maañ ke jhukā.e sar

thā ik hilāl mahr ke pahlū meñ jalva-gar

maañ kahtī thī na rovo magar chup na hote the

āñkheñ thiiñ band hichkiyāñ le le ke rote the

ghabrā ke pūchhne lage mahbūb-e-zul-jalāl

rotā hai kyuuñ husain ye kyā hai tumhārā haal

bolīñ butūl aaj qalaq hai mujhe kamāl

royā hai ye husain ki āñkheñ haiñ donoñ laal

aate haiñ hañste rote hue ghar meñ jaate haiñ

shafqat bhī aap hī karte haiñ aap hī rulāte haiñ

hāthoñ ko joḌtī huuñ maiñ yā shāh-e-bahr-o-bar

shafqat kī us ke haal pe har-dam rahe nazar

rone se us ke hotā hai TukḌe mirā jigar

mujh fāqa-kash ġharīb kā pyārā hai ye pisar

haidar se pūchhiye mire usrat ke haal ko

kis kis dukhoñ se paalā hai is naunihāl ko

ashk us ke jitne Tapke haiñ yā shāh-e-nek-ḳhū

utnā hī ghaT gayā hai mire jism kā lahū

ro.e haiñ phuuT phuuT ke ye mere rū-ba-rū

tar ho gayā hai āñsuoñ se chāñd sā gulū

dekhā na thā ye maiñ ne jo haal is kā aaj hai

hazrat to jānte haiñ ki nāzuk mizāj hai

shafqat se aaj aap ne chūme hasan ke lab

bosa liyā na un ke laboñ kā ye kyā sabab

rutbe meñ donoñ ek haiñ yā survar-e-arab

maiñ sach kahūñ ye sun ke mujhe bhī huā ojab

is ko jo ho ḳhushī to dil is kā bhī shaad ho

chhoTe se chāhiye ki mohabbat ziyād ho

aap un ke naaz uThāte haiñ yā shāh-e-bahr-o-bar

phir kis se rūTheñ aap se rūTheñ na ye agar

aksar inheñ chaḌhāyā hai hazrat ne dosh par

gesū diye haiñ nanhe se hāthoñ meñ besh-tar

rūThe the ye so qadmoñ pe sar dharne aa.e haiñ

muñh ke na chūmne kā gilā karne aa.e haiñ

ye kah ke phir husain se bolīñ ba-chashm-tar

lo jā ke ab nabī ke qadam par jhukāo sar

aa.e husain haath jo nanhe se joḌ kar

be-iḳhtiyār rone lage sayyad-ul-bashar

rah rah ke dekhte the alī o butūl ko

nazdīk thā qalaq se ġhash aa.e rasūl ko

thī āñsuoñ se rīsh-e-mubārak tamām nam

fart-e-bukā se ḳhaak pa jhukte the dam-ba-dam

gaahe sutūñ se lag ke hue raast gaah ḳham

har lahza iztirāb ziyāda thā sabr kam

ho saktā thā na zabt shah-e-mashriqain se

rote the baar baar lipaT kar husain se

shabbīr ro ke kahte the naanā na roiye

ro.eñge ab na ham shah-e-vālā na roiye

hilne lagegā arsh-e-muallā na roiye

phaTtā hai ab hamārā kaleja na roiye

sau baar din meñ ham to muñh ashkoñ se dhote haiñ

hazrat hamāre rone pe kaahe ko rote haiñ

ghabrā ga.e alī-e-valī shāh-e-bahr-o-bar

kī arz fātima ne jhukā ke qadam pe sar

beTī nisār ho ga.ī yā sayyad-ul-bashar

kyā vaj.h hai jo aap haiñ is tarah nauha gar

jaldī batā.iye ki mujhe taab ab nahīñ

ronā ḳhudā ke dost kā ye be-sabab nahīñ

hazrat ko ilm-e-ġhaib hai yā shāh-e-ins-o-jāñ

ā.inda o guzishta kā sab haal hai ayaañ

kyā aa.ī aaj vahī-e-ḳhudāvand-e-do-jahāñ

honā hai jo husain pe mujh se karo bayāñ

fāqoñ se kāTtī huuñ musībat jahān kī

kyuuñ bāba-jān ḳhair to hai is kī jaan kī

bole jigar ko thaam ke mahbūb-e-zul-jalāl

tujh se sunā na jā.egā ai fātima ye haal

kis muñh se maiñ kahūñ ki qalaq hai mujhe kamāl

zehrā shahīd hue hoveñge tere ye donoñ laal

mātam kī ye ḳhabar abhī jibrīl laa.e the

saare malak husain ke purse ko aa.e the

almās pī ke huegā be-jāñ tirā hasan

ye vaj.h hai ki chūmtā huuñ us kā maiñ dahan

bhar jā.egā kalejoñ ke TukḌoñ se sab lagan

hogā zamurradī tire is laal kā badan

sū-e-bahisht jab ye jahāñ se sidhāreñge

bad-kesh tiir is ke janāze pa māreñge

zehrā mujhe kalām kī tāqat nahīñ hai ab

halq-e-husain chūmne kā kyā kahūñ sabab

ik ban meñ tiin roz raheñge ye tishna-lab

kaT jā.egā galā yahī ḳhanjar se hai ġhazab

neze pe sar chaḌhegā tire nūr-e-ain kā

ghoḌoñ se rauñd Dāleñge lāsha husain kā

ro.e ḳhabar ye kah ke jo mahbūb-e-zul-minan

ghabrā ke muñh husain kā takne lage hasan

zehrā pukārī haa.e luTegā mirā chaman

maiñ mar ga.ī duhā.ī hai yā sarvar-e-zaman

ye kaisī aag hai ki mirī kokh jal ga.ī

hai hai chhurī kaleje pe zehrā ke chal ga.ī

fariyād yā-nabī shah-e-abrār al-ġhiyās

ai mursilān-e-haq ke madad-gār al-ġhiyās

ai be-kasoñ ke vāris o sardār ul-ġhiyās

qudarat hai sab tarah kī shah-e-mashriqain ko

hazrat se lūñgī apne hasan aur husain ko

kis jurm par ye laal mire qatl hoñge aah

ro kar kahā rasūl-e-ḳhudā ne ki be-gunāh

kī arz fātima ne ki ai arsh-e-bār-gāh

bachchoñ ko mere kyā na milegī kahīñ panāh

talvāreñ kheñch kheñch ke zālim jo ā.eñge

hazrat na kyā navāsoñ ko apne bachā.eñge

āsāñ hai kyā jo qatl kareñge sitam-shi.ār

kyā sher-e-haq kamar se na khīñcheñge zul-fiqār

aadā pe kyā chalegā na dast-e-ḳhudā kā vaar

bāloñ ko kyā na kholegī zehrā jigar figār

TukḌe jigar jo huegā mujh dil do-nīm kā

paaya na kyā hilā.ūñgī arsh-e-azīm kā

zehrā se ro ke kahne lage shāh-e-nek-ḳhū

beTī mujhe satā.eñge turbat meñ kīna-jū

is vaqt qatl hoveñge ye donoñ māh-rū

duniyā meñ jab na hogā alī aur na maiñ na tū

lāshe pe mujtabā ke tū shabbīr ro.egā

shabbīr jab maregā to koī na huegā

chillā.ī sar paTak ke ye zehrā ki hai sitam

pīTegā kaun tan se jo niklegā us kā dam

mātam kī saf bichhā.egā kaun ai shah-e-umama

purse ko kaun aa.egā us ke ba-chashm-e-nam

ham meñ se aise vaqt jo koī na huegā

hai hai mire husain ko phir kaun ro.egā

bachche kī mere tāziya-dārī karegā kaun

muñh Dhāñp Dhāñp girya-o-zārī karegā kaun

dariyā-e-ashk chashm se jaarī karegā kaun

imdād bād-e-marg hamārī karegā kaun

hogā kahāñ nabī ke navāse kā fātiha

sharbat pe kaun devegā pyāse kā fātiha

bole nabī ki aap ko zehrā na kar halāk

farmā chukā hai mujh se ye va.ada ḳhudā-e-pāk

paidā kareñge qaum ik aisī ba-rū-e-ḳhāk

jo raat din raheñge isī ġham meñ dard-nāk

bazm-e-azā meñ ā.eñge vo duur duur se

tan ḳhaak se banā.eñge dil un ke nuur se

hogī unhīñ se majlis-e-mātam kī zeb-o-zain

deñge unheñ vo lab ki rahe jis pe vā husain

āñkheñ vo deñge rone ko samjheñ jo farz-e-ain

haath aise ġhair sīna-zanī ho jinheñ na chain

sāmān tāziyat ke kabhī kam na hoveñge

vo hashr tak husain ke mātam meñ ro.eñge

hogā ayaañ falak pe moharram kā jab hilāl

raḳht-e-siyāh pahneñge bar meñ vo ḳhush-ḳhisāl

kholeñgī bībayāñ bhī sab apne saroñ ke baal

har ghar meñ hogā shor ki hai hai alī kā laal

leñge sile meñ ḳhuld tire nūr-e-ain se

aañsū aziiz vo na kareñge husain se

pyāsā shahīd hogā jo terā ye dil-rubā

momin sabīleñ rakkheñge paanī kī jā-ba-jā

hovegī shaad ruuh shahīdān-e-karbalā

bhar bhar ke āb-e-sard pukāreñge barmalā

mahbūb-e-kibriyā ke navāse kī nazr hai

pyāse na jā.iyo ki ye pyāse kī nazr hai

kahne lagī nabī se butūl-e-falak-janāb

hai hai maiñ kyā karūñ mire dil ko nahīñ hai taab

ai bādshāh-e-kaun-o-makāñ mālikur-riqāb

dargāh-e-haq meñ aap kī hai arz mustajāb

kiije duā ki ḳhāliq-e-akbar madad kare

allāh ye balā mire bachche kī rad kare

beTī se ro ke kahne lage shāh-e-kā.enāt

rūh-ul-amīñ ne mujh se to ye bhī kahī hai baat

chāho to rad kare ye balā rabb-e-pāk-zāt

lekin na huegī mire ummat kī phir najāt

mahbūb-e-haq nisār tire nūr-e-ain par

mauqūf hai ye amar to qatl-e-husain par

allāh-re sabr-e-mahbūb-e-kirdgār

ummat kā naam sun ke jhukāyā sar ek baar

ḳhush-nūd ho ke kahne lage shāh-e-zul-fiqār

sadqe hasan husain tasadduq alī nisār

is raah meñ na maal na daulat aziiz hai

pyāre pisar nahīñ hameñ ummat aziiz hai

kahne lage husain se phir shāh-e-bahr-o-bar

batlā mujhe ki kyā tirī marzī hai ai pisar

naanā se bole chhoTe se hāthoñ ko joḌ kar

ummat ke kaam aa.e to hāzir abhī hai sar

va.ada ko ham na bhūleñge go ḳhurd-sāl haiñ

chhoTe nahīñ haiñ muḳhbir-e-sādiq ke laal haiñ

rote haiñ aap kis liye yā sayyad-e-umam

raazī haiñ ham pe rāh-e-ḳhudā meñ hoñ jo sitam

talvāreñ bhī chaleñ to nahīñ mārne ke dam

ummat pe apne sar ko tasadduq kareñge ham

ham rāst-go haiñ baat pe jis vaqt aate haiñ

kahte haiñ jo zabāñ se vahī kar dikhāte haiñ

bachpan meñ jo zabāñ se kahā thā kiyā vo kaam

jis vaqt ran meñ TuuT paḌe shah pe fauj-e-shām

gardan jhukā ke barchhiyāñ khāyā kiye imaam

ḳhuuñ meñ qabā rasūl kī tar ho ga.ī tamām

teġheñ alī ke laal ke shāne pe chal ga.iiñ

chhātī ke paar nezoñ kī nokeñ nikal ga.iiñ

pherī na thī jo pusht-e-mubārak dam-e-masāf

the do hazār zaḳhm faqat sar se tā-ba-nāf

sayyad se be-vatan se zamāna thā bar-ḳhilāf

ġhul thā ki aaj hotā hai ghar fātima kā saaf

sambhlā na jā.egā ḳhalaf-e-bū-turāb se

lo vo qadam husain ke nikle rikāb se

meñh kī tarah barasne lage shāh-e-dīñ pe tiir

tharrā rahe the lag ke tan-e-nāznīñ pe tiir

dāman pe tiir jaib pe tiir āstīñ pe tiir

pahlū pe teġh siina pe neza jabīñ pe tiir

dāġhoñ se ḳhuuñ ke raḳht-e-badan lāla-zār thā

shakl-e-zarīh sīna-e-aqdas figār thā

tar thī lahū meñ zulf-e-shikan-dar-shikan judā

majrūh lāl-e-lab the judā aur dahan judā

darpai the neza-dār judā teġhzan judā

kaT kaT ke ho gayā thā har ik uzv-e-tan judā

sī-pāra thā na sadr faqat us janāb kā

purze varaq-varaq thā ḳhudā kī kitāb kā

kartā thā vaar barchhiyoñ vāloñ kā jab parā

teġhoñ se dam bhī lene kī mohlat na thī zarā

nezoñ meñ ḳhuuñ nabī ke navāse kā thā bharā

shamshīr-o-tīr neza-o-ḳhanjar ke māvarā

thiiñ saḳhtiyāñ sitam kī shah-e-ḳhush-ḳhisāl par

chalte the sañg fāima-zehrā ke laal par

the do hazār jism-e-shah-e-bahr-o-bar pe zaḳhm

māthe pe zaḳhm tiir ke teġhoñ ke sar pe zaḳhm

gardan pe zaḳhm siine pe zaḳhm aur kamar pe zaḳhm

aur is ke māvarā the bahattar jigar pe zaḳhm

ghoḌe pe gah sambhalte the gah Dagmagāte the

ġhash aatā thā to hirne pe sar ko jhukāte the

ghoḌe pe jab sambhalne kī mutlaq rahī na taab

hāthoñ se baag chhūT ga.ī aur paañv se rikāb

girne lagā jo ḳhaak pe vo āsmāñ-janāb

marqad meñ be-qarār huī rūh-e-bū-turāb

ġhul thā ki ḳhaak par shah-e-kaun-o-makāñ girā

bas ab zamīñ ulaT ga.ī aur āsmāñ girā

jaltī huī zamīñ pe taḌapne lage imaam

be-kas pe zālimoñ ne kiyā aur izhdihām

us vaqt shimr se ye umar ne kiyā kalām

haañ tan se jald kaaT sar-e-sarvar-e-anām

dariyo na sun ke fāima-zehrā kī aah ko

gul kar de sham-e-qabr-e-risālat-panāh ko

ye sunte hī chaḌhā.ī sitam-gar ne āstīñ

ḳhanjar kamar se khīñch ke aage baḌhā liiñ

the qibla-rū jhuke hue sajde meñ shāh-e-dīñ

lab hilte dekhe shaah ke aayā vo jab qarīñ

samjhā ki tishnagī se jo sadme guzarte haiñ

us vaqt bad-duā mujhe shabbīr karte haiñ

jhuk kar qarīb kaan jo laayā to ye sunā

haq meñ gunāhgāroñ ke karte haiñ shah duā

jaarī zabān-e-ḳhushk pe ye hai ki ai ḳhudā

kar hājatoñ ko mere muhibboñ kī to ravā

shī.oñ kā hashr roz-e-jazā mere saath ho

merā ye ḳhūñ-bahā hai ki un kī najāt ho

ye sun ke musta.id huā vo shah ke qatl par

zaanū rakhā husain ke siine pa be-ḳhatar

gardan pe pherne lagā ḳhanjar jo bad-guhar

aa.ī sadā alī kī ki hai hai mire pisar

zehrā pukārī kuchh bhī nabī se hijāb hai

zālim ye bosa-gāh-e-risālat-ma.āb hai

kyuuñ zab.h mere laal ko kartā hai be-gunāh

kyuuñ kāTtā hai mere kaleje ko rū-siyāh

kashtī ko ahl-e-bait-e-nabī kī na kar tabāh

maiñ fātima huuñ arsh hilā.egī merī aah

huegā hashr qatl jo ye be-vatan huā

ye mar gayā to ḳhātma-e-panj-tan huā

āvāz apnī maañ kī ye zainab ne jab sunī

dauḌī nikal ke ḳheme se sar pīTtī huī

dekhā ki zab.h kartā hai hazrat ko vo shaqī

sar piiT kar ye kahne lagī vo jigar-jalī

hai hai na tiin roz ke pyāse ko zab.h kar

zālim na mustafā ke navāse ko zab.h kar

baano pukārtī thī ye kyā kartā hai la.iiñ

pyāsā hai tiin roz se haidar kā jā-nashīñ

chillātī thī sakīna ki jiine kī maiñ nahīñ

baabā ko zab.h kartā hai kyuuñ ai udū-e-dīñ

ḳhanjar na pher chāñd sī gardan pe rahm kar

abbā ko chhoḌ de mire bachpan pe rahm kar

zaḳhmoñ se chuur chuur hai zehrā kā yādgār

jis chhātī par meñ sotī thī us par hai to savār

baabā ke halq par na phirā ab chhurī kī dhaar

badle pidar ke sar ko mare tan se tū utaar

sayyad pe tishna-lab pe sitam is qadar na kar

potī huuñ fātima kī mujhe be-pidar na kar

ro kar bayāñ ye kartī thī vo soḳhta-jigar

de kar duhā.ī ahl-e-haram pīTte the sar

kartā thā zab.h shah ko vahāñ shimr-e-bad guhar

farmāte the ye shaah ki pyāsā huuñ rahm kar

paanī diyā na haa.e nabī ke navāse ko

jallād zab.h karne lagā bhūke pyāse ko

āḳhir sar-e-imām-e-umam tan se kaT gayā

chillā ke fātima ne ye zainab ko dī sadā

maidāñ se jald le ke sakīna ko ghar meñ jā

be-jurm kaT gayā tire maañ jaa.e kā galā

maarā ba-zulm shimr ne pyāse ko jaan se

maiñ laT ga.ī husain sidhāre jahān se

bas ai 'anīs' bazm meñ hai nāla-o-fuġhāñ

pūchh un ke dil se jo haiñ suḳhan-fahm nukta-dāñ

haq hai sunā nahīñ kabhī us husn kā bayāñ

goyā ki ye ḳhalīq kī hai sar-ba-sar zabāñ

sach hai ki is zabāñ ko koī jāntā nahīñ

jo jāntā hai aur ko vo māntā nahīñ

dasht-e-wigha mein nur-e-KHuda ka zuhur hai

dasht-e-wigha mein nur-e-KHuda ka zuhur hai

zarron mein raushni-e-tajalli-e-tur hai

ek aaftab-e-ruKH ki ziya dur dur hai

koson zamin aks se dariya-e-nur hai

allah-re husn tabqa-e-ambar-sarisht ka

maidan-e-karbala hai namuna bahisht ka

hairan zamin ke nur se hai charKH-e-lajward

manind-e-kahruba hai ruKH-e-aftab-e-zard

hai ru-kash-e-faza-e-iram wadi-e-nabard

uThta hai KHak se tataq-e-nur ja-e-gard

hairat se hamilan-e-falak un ko takte hain

zarre nahin zamin pe sitare chamakte hain

hai aab-e-nahr surat-e-aina jalwa-gar

taban hai misl-e-chashma-e-KHurshid har bhanwar

lahren bisan-e-barq chamakti hain sar-ba-sar

pani pe machhliyon ki Thaharti nahin nazar

ye aab-o-tab hai ki guhar aab aab hain

dariya to aasman hain sitare hubab hain

partaw-fagan hua jo ruKH-e-qibla-e-anam

mashhur ho gai wo zamin arsh-ehtisham

aur sang-reze durr-e-najaf ban gae tamam

sahra ko mil gaya sharaf-e-wadi-assalam

kabe se aur najaf se bhi izzat siwa hui

KHak us zamin-e-pak ki KHak-e-shifa hui

phaila jo nur-e-mahr-e-imamat dam-e-zawal

zarron se wan ke aankh milana hua muhaal

sare nihaal faiz-e-qadam se hue nihaal

aKHtar bane jo phul to shaKHen banin hilal

patte tamam aaina-e-nur ho gae

sahra ke naKHl sab shajar-e-tur ho gae

ghul tha zahe husain ki shaukat zahe waqar

goya khaDe hain jang ko mahbub-e-kirdgar

ruKH se ayan hai dabdaba-e-shah-e-zul-fiqar

hai nur-e-haq jabin-e-munawwar se aashkar

kyunkar chhupe na mah-e-do-hafta hijab se

chauda tabaq mein nur hai us aaftab se

ye ru-e-raushan aur ye gesu-e-mushk-e-fam

yan sham mein to subh hai aur subh mein hai sham

haale mein yun nazar nahin aata hai mah tamam

qudarat KHuda ki nur ka zulmat mein hai maqam

zulfon mein jalwa-gar nahin chehra janab ka

hai nisf shab mein aaj zuhur aaftab ka

qurban kaman-e-abru-e-maula pe jaan o dil

gar mah-e-nau kahen to hai tashbih mubtazil

chashm-e-ghazal-e-dasht-e-KHutan chashm se KHajil

dekha jise karam se KHataen huin bahil

putli bisan-e-qibla-numa be-qarar hai

giryan hain wo ye gardish-e-lail o nahaar hai

ruKHsar hain ziya mein qamar se ziyaada-tar

jin par Thahar saki na kabhi shams ki nazar

rish-e-moKHazzab aur ye ruKH-e-shah-e-bahr o bar

paida hain saf mani-e-wal-lailo-o-wal-qamar

quran se ayan hai buzurgi imam ki

khai qasam KHuda ne isi subh o sham ki

kis munh se kijiye lab-e-jaan-baKHsh ka bayan

chusi jinhon ne ahmad muKHtar ki zaban

kya durr-e-ab-dar hain is durj mein nihan

goya ki motiyon ka KHazana hai ye dahan

zarre zamin pe aks se sare chamak gae

jis waqt ye khile to sitar chamak gae

sham-e-harim-e-lam-yazali tha gulu-e-shah

tarik shab mein jaise huwaida ho nur-e-mah

ai charKH-e-be-madar ye kaisa sitam hai aah

shamshir-e-shimr aur mohammad ki bosa-gah

jis par rasul honTon ko malte hon pyar se

kaT jae karbala main wo KHanjar ki dhaar se

manzur yan thi madh-e-gulu-e-shah-e-umam

yaad aa gai magar ye hadis-e-gham-o-alam

masjid mein jalwa-gar the rasul-e-falak-hasham

malte the zikr-e-haq mein lab-e-pak dam-ba-dam

raushan the baam-o-dar ruKH-e-raushan ke nur se

aaina ban gai thi zamin tan ke nur se

tha jo sutun ki rukn-e-risalat ka takiya-gah

kursi bhi us ki pusht ki thi DhunDhti panah

tha jis hasir par wo do aalam ka baadshah

hasrat se arsh karta tha us farsh par nigah

auj-e-zamin bahisht-e-barin se do-chand tha

mimbar ka nuh falak se bhi paya buland tha

ashab-e-KHas gird the anjum ki tarah sab

taban tha bich mein wo mah-e-hashmi-laqab

sar par malak-sifat magas-raan the do arab

jibril tah kiye hue the zanu-e-adab

KHadim bilal-o-qumbar-e-gardun-asas tha

nalain is ke pas asa us ke pas tha

gesu the wo mufassir-e-wallail-iza-saja

ruKH se ayan the mani-e-washshams-o-wa-zzuha

wo rish-e-pak aur ruKH-e-sardar-e-ambiya

goya dhara tha rehl pe quran khula hua

oDhe siyah aba jo wo aalam-panah tha

kaba ka saf hajiyon ko ishtibah tha

pahlu mein baadshah ke tha jalwa-gar wazir

sardar-e-din ali-e-wali KHalq ka amir

donon jahan mein koi na donon ka tha nazir

ahmad the aaftab to haidar mah-e-munir

zahir mein ek nur ka do ja zuhur tha

gar ghaur kijiye to wahi ek nur tha

masruf-e-waz-o-pand the sultan-e-mashriqain

jo ghar se nikle khelte zohra ke nur ain

nana baghair donon nawason ko tha na chain

baDh jate the hasan kabhi aage kabhi husain

kahte the dekhen kaun qadam jald uThata hai

nana ke pas kaun bhala pahle jata hai

wo gore gore chehron pe zulfen idhar udhar

aKHtar se wo chamakte hue kan ke guhar

rashk-e-hilal tauq gale ghairat-e-qamar

haikal pe naqsh nam KHuda-e-jalil ke

tawiz gardanon pe par-e-jibril ke

masjid mein aae hanste hue jab wo gul-badan

KHushbu se sehan-e-masjid-e-jame bana chaman

taslim ko husain se pahle jhuke hasan

KHush ho ke muskurane lage sarwar-e-zaman

baDh baDh ke KHam salam ko chhoTe baDe hue

baiThe rahe rasul malak uTh khaDe hue

beTon ko tha ali ka ishaara ki baiTh jao

lazim nahin ki waz mein nana ko tum satao

phaila ke hath bole mohammad ki aao aao

shabbir ne kaha hamein pahle gale lagao

bhai hasan jo aap ki godi mein aaen ge

hum tum se nana jaan abhi ruTh jaen ge

bole hasan ki wah hamein aur karen na pyar

iqrar ke chuke hain shahanshah-e-nam-dar

bole ba-chashm-e-nam ye husain-e-falak-waqar

dekhen to kaun kandhe pe hota hai ab sawar

sab se siwa jo hain so hamin un ke pyare hain

aage na baDhiye aap ki nana hamare hain

bhai se tab kaha ye hasan ne ba-iltifat

be-wajh hum se ruThe ho tum ai niko-sifat

nana hamare kya nahin sultan-e-kaenat

hoti hai nagawar tumhein to zara si baat

ghussa na itna chahiye KHush-KHu ke waste

machle the yun hi bachcha-e-ahu ke waste

ye sun ke munh ali ka lage dekhne rasul

hans kar kaha ye donon hain mere chaman ke phul

main chahta hun ek ki KHatir na ho malul

roenge ye to ghar se nikal aaegi butul

howe na ranj mere kisi nur-e-ain ko

tum lo hasan ko god mein main lun husain ko

shabbar se phir ishaara kiya ho ke be-qarar

ghussa na khao pahle tumhin ko karenge pyar

phir bole dekh kar su-e-shabbir-e-nam-dar

aa ai husain aa teri baaton ke main nisar

chhati se hum lagaenge jaan apni jaan kar

dekhen to pahle kaun lipaTta hai aan kar

dauDe ye baat sun ke barabar wo KHush-sayar

pas aae aaftab-e-risalat ke do qamar

lipTe husain hans ke idhar aur hasan udhar

the panw zanuon pe to baala-e-dosh sar

nana ke sath pyar mein donon ka sath tha

gardan mein ek un ka aur un ka hath tha

phir phir ke dekhte the shahanshah-e-mashriqain

gah jaanib-e-hasan to kabhi jaanib-e-husain

baiThe jo zanuon pe wo zehra ke nur-e-ain

tha tan ko lutf qalb ko rahat jigar ko chain

jhuk jhuk ke munh rasul-e-zaman chumne lage

in ka gala to un ka dahan chumne lage

shabbir chahte the ki chumen mere bhi lab

par kuchh gale ke boson ka khulta na tha sabab

nana ke munh ke pas ye late the munh ko jab

jhuk jhuk ke chumte the gala sayyad-e-arab

bhai ko dekh kar jo hasan muskuraate the

ghairat se un ki aankhon mein aansu bhar aate the

uTThe husain zanu-e-ahmad se KHashm-gin

ghusse se rang zard aur aankhon pe aastin

ruKH par pasina jism mein rasha jabin pa chin

puchha kidhar chale to ye bole kahin nahin

ghar mein akele tewari chaDhae chale gae

dekha na phir ke sar ko jhukae chale gae

baitushsharf mein aae jo shabbir-e-nam-dar

kurte ko munh pe rakh ke lage rone zar-zar

dauDin ye kah ke faima-zehra jigar-figar

hai hai husain kya hua tu kyun hai ashk-bar

tujh ko rula ke gham mein mujhe mubtala kiya

qurban ho gai tujhe kis ne KHafa kiya

mera kaleja phahTta hai ai dilruba na ro

zehra hazar jaan se tujh pe fida na ro

sar mein na dard ho kahin ai mah-laqa na ro

bas bas na ro husain bara-e-KHuda na ro

meri taraf to dekho ki betab hoti hun

chadar se munh ko Dhanp ke lo main bhi roti hun

tu munh to khol ai mere shabbir-e-KHush-KHisal

tar ho gae hain aansuon se gore gore gal

mal mal ke pusht-e-dast se aankh karo na lal

suljhaun aao uljhe hue gesuon ke baal

ghar se gae the sath juda ho ke aae ho

samjhi main kuchh hasan se KHafa ho ke aae ho

tum chup raho wo ghar mein to masjid se phir ke aaen

guzri main khel se mere bachche ko kyun rulaen

un se na boliyo wo tumhein lakh gar manaen

lo aao jaane do tumhein chhati se hum lagaen

wari agar hasan ne rulaya bura kiya

puchhungi kya na main mere pyare ne kya kiya

bole husain hum to hain is baat par KHafa

nana ne chume bhai ke honT aur mera gala

tum amman-jaan munh ko to sungho mere zara

kuchh bu-e-nagawar hai mere dahan mein kya

bhai ke lab se apne labon ko milate hain

ab hum na jaen ge hamein nana rulate hain

munh rakh ke munh pe boli ye zehra jigar-figar

bu-e-gulab aati hai ai mere gul-azar

chuma agar gala to KHafa ho na main nisar

tum ko zaban chusate the mahbub-e-kirdgar

ye mushk mein mahak na gul-e-yasman mein hai

KHush-bu usi dahan ki tumhaare dahan mein hai

kahne lage husain ye man se ba-chashm-e-nam

kya jaano tum hasan se hamein chahte hain kam

ye kya unhin pe lutf-o-inayat hai dam-ba-dam

malum ho gaya unhen pyare nahin hain hum

ro ro ke aaj jaan hum apni ganwaenge

pani na ab piyenge na khane ko khaenge

ye baat sun ke ho gaya zehra ka rang faq

boli pisar se ro ke wo bint-e-rasul-e-haq

sadqe gai karo na kaleje ko mere shaq

hai hai ye kya kaha mujhe hota hai ab qalaq

mera lahu bahega jo aansu bahaoge

kahe ko man jiyegi jo khana na khaoge

ye kah ke oDh li sar-e-pur-nur par rida

moze pahan ke god mein shabbir ko liya

dar tak gai jo ghar se wo dil-band-e-mustafa

fizza ne baDh ke buzar o salman ko di sada

pesh-e-nabi husain ko godi mein lati hain

haT jao sab ki fatima masjid mein aati hain

allah-re aamad aamad-e-zehra ka bandobast

saton falak the auj-e-sharafat se jis ke past

ahmad ke gird-o-pesh se uTThe KHuda-parast

insan to kya malak ko na thi qudarat-e-nishast

aain to shad-shad rasul-e-zaman hue

ghar mein KHuda ke ek jagah panj-tan hue

tazim-e-fatima ko uThe sayyad-ul-bashar

dekha ki chashm-e-fatima hai aansuon se tar

gham the husain dosh pe man ke jhukae sar

tha ek hilal mahr ke pahlu mein jalwa-gar

man kahti thi na rowo magar chup na hote the

aankhen thin band hichkiyan le le ke rote the

ghabra ke puchhne lage mahbub-e-zul-jalal

rota hai kyun husain ye kya hai tumhaara haal

bolin butul aaj qalaq hai mujhe kamal

roya hai ye husain ki aankhen hain donon lal

aate hain hanste rote hue ghar mein jate hain

shafqat bhi aap hi karte hain aap hi rulate hain

hathon ko joDti hun main ya shah-e-bahr-o-bar

shafqat ki us ke haal pe har-dam rahe nazar

rone se us ke hota hai TukDe mera jigar

mujh faqa-kash gharib ka pyara hai ye pisar

haidar se puchhiye mere usrat ke haal ko

kis kis dukhon se pala hai is naunihaal ko

ashk us ke jitne Tapke hain ya shah-e-nek-KHu

utna hi ghaT gaya hai mere jism ka lahu

roe hain phuT phuT ke ye mere ru-ba-ru

tar ho gaya hai aansuon se chand sa gulu

dekha na tha ye main ne jo haal is ka aaj hai

hazrat to jaante hain ki nazuk mizaj hai

shafqat se aaj aap ne chume hasan ke lab

bosa liya na un ke labon ka ye kya sabab

rutbe mein donon ek hain ya surwar-e-arab

main sach kahun ye sun ke mujhe bhi hua ojab

is ko jo ho KHushi to dil is ka bhi shad ho

chhoTe se chahiye ki mohabbat ziyaad ho

aap un ke naz uThate hain ya shah-e-bahr-o-bar

phir kis se ruThen aap se ruThen na ye agar

aksar inhen chaDhaya hai hazrat ne dosh par

gesu diye hain nanhe se hathon mein besh-tar

ruThe the ye so qadmon pe sar dharne aae hain

munh ke na chumne ka gila karne aae hain

ye kah ke phir husain se bolin ba-chashm-tar

lo ja ke ab nabi ke qadam par jhukao sar

aae husain hath jo nanhe se joD kar

be-iKHtiyar rone lage sayyad-ul-bashar

rah rah ke dekhte the ali o butul ko

nazdik tha qalaq se ghash aae rasul ko

thi aansuon se rish-e-mubarak tamam nam

fart-e-buka se KHak pa jhukte the dam-ba-dam

gahe sutun se lag ke hue rast gah KHam

har lahza iztirab ziyaada tha sabr kam

ho sakta tha na zabt shah-e-mashriqain se

rote the bar bar lipaT kar husain se

shabbir ro ke kahte the nana na roiye

roenge ab na hum shah-e-wala na roiye

hilne lagega arsh-e-mualla na roiye

phaTta hai ab hamara kaleja na roiye

sau bar din mein hum to munh ashkon se dhote hain

hazrat hamare rone pe kahe ko rote hain

ghabra gae ali-e-wali shah-e-bahr-o-bar

ki arz fatima ne jhuka ke qadam pe sar

beTi nisar ho gai ya sayyad-ul-bashar

kya wajh hai jo aap hain is tarah nauha gar

jaldi bataiye ki mujhe tab ab nahin

rona KHuda ke dost ka ye be-sabab nahin

hazrat ko ilm-e-ghaib hai ya shah-e-ins-o-jaan

aainda o guzishta ka sab haal hai ayan

kya aai aaj wahi-e-KHudawand-e-do-jahan

hona hai jo husain pe mujh se karo bayan

faqon se kaTti hun musibat jahan ki

kyun baba-jaan KHair to hai is ki jaan ki

bole jigar ko tham ke mahbub-e-zul-jalal

tujh se suna na jaega ai fatima ye haal

kis munh se main kahun ki qalaq hai mujhe kamal

zehra shahid hue howenge tere ye donon lal

matam ki ye KHabar abhi jibril lae the

sare malak husain ke purse ko aae the

almas pi ke huega be-jaan tera hasan

ye wajh hai ki chumta hun us ka main dahan

bhar jaega kalejon ke TukDon se sab lagan

hoga zamurradi tere is lal ka badan

su-e-bahisht jab ye jahan se sidhaarenge

bad-kesh tir is ke janaze pa marenge

zehra mujhe kalam ki taqat nahin hai ab

halq-e-husain chumne ka kya kahun sabab

ek ban mein tin roz rahenge ye tishna-lab

kaT jaega gala yahi KHanjar se hai ghazab

neze pe sar chaDhega tere nur-e-ain ka

ghoDon se raund Dalenge lasha husain ka

roe KHabar ye kah ke jo mahbub-e-zul-minan

ghabra ke munh husain ka takne lage hasan

zehra pukari hae luTega mera chaman

main mar gai duhai hai ya sarwar-e-zaman

ye kaisi aag hai ki meri kokh jal gai

hai hai chhuri kaleje pe zehra ke chal gai

fariyaad ya-nabi shah-e-abrar al-ghiyas

ai mursilan-e-haq ke madad-gar al-ghiyas

ai be-kason ke waris o sardar ul-ghiyas

qudarat hai sab tarah ki shah-e-mashriqain ko

hazrat se lungi apne hasan aur husain ko

kis jurm par ye lal mere qatl honge aah

ro kar kaha rasul-e-KHuda ne ki be-gunah

ki arz fatima ne ki ai arsh-e-bar-gah

bachchon ko mere kya na milegi kahin panah

talwaren khench khench ke zalim jo aaenge

hazrat na kya nawason ko apne bachaenge

aasan hai kya jo qatl karenge sitam-shiar

kya sher-e-haq kamar se na khinchenge zul-fiqar

aada pe kya chalega na dast-e-KHuda ka war

baalon ko kya na kholegi zehra jigar figar

TukDe jigar jo huega mujh dil do-nim ka

paya na kya hilaungi arsh-e-azim ka

zehra se ro ke kahne lage shah-e-nek-KHu

beTi mujhe sataenge turbat mein kina-ju

is waqt qatl howenge ye donon mah-ru

duniya mein jab na hoga ali aur na main na tu

lashe pe mujtaba ke tu shabbir roega

shabbir jab marega to koi na huega

chillai sar paTak ke ye zehra ki hai sitam

piTega kaun tan se jo niklega us ka dam

matam ki saf bichhaega kaun ai shah-e-umama

purse ko kaun aaega us ke ba-chashm-e-nam

hum mein se aise waqt jo koi na huega

hai hai mere husain ko phir kaun roega

bachche ki mere taziya-dari karega kaun

munh Dhanp Dhanp girya-o-zari karega kaun

dariya-e-ashk chashm se jari karega kaun

imdad baad-e-marg hamari karega kaun

hoga kahan nabi ke nawase ka fatiha

sharbat pe kaun dewega pyase ka fatiha

bole nabi ki aap ko zehra na kar halak

farma chuka hai mujh se ye wada KHuda-e-pak

paida karenge qaum ek aisi ba-ru-e-KHak

jo raat din rahenge isi gham mein dard-nak

bazm-e-aza mein aaenge wo dur dur se

tan KHak se banaenge dil un ke nur se

hogi unhin se majlis-e-matam ki zeb-o-zain

denge unhen wo lab ki rahe jis pe wa husain

aankhen wo denge rone ko samjhen jo farz-e-ain

hath aise ghair sina-zani ho jinhen na chain

saman taziyat ke kabhi kam na howenge

wo hashr tak husain ke matam mein roenge

hoga ayan falak pe moharram ka jab hilal

raKHt-e-siyah pahnenge bar mein wo KHush-KHisal

kholengi bibayan bhi sab apne saron ke baal

har ghar mein hoga shor ki hai hai ali ka lal

lenge sile mein KHuld tere nur-e-ain se

aansu aziz wo na karenge husain se

pyasa shahid hoga jo tera ye dil-ruba

momin sabilen rakkhenge pani ki ja-ba-ja

howegi shad ruh shahidan-e-karbala

bhar bhar ke aab-e-sard pukarenge barmala

mahbub-e-kibriya ke nawase ki nazr hai

pyase na jaiyo ki ye pyase ki nazr hai