aaj ek harf ko phir DhunDta phirta hai KHayal

aaj ik harf ko phir DhūñDtā phirtā hai ḳhayāl

madh bharā harf koī zahr bharā harf koī

dil-nashīñ harf koī qahr bharā harf koī

harf-e-ulfat koī dildār-e-nazar ho jaise

jis se miltī hai nazar bosa-e-lab kī sūrat

itnā raushan ki sar-e-mauja-e-zar ho jaise

sohbat-e-yār meñ āġhāz-e-tarab kī sūrat

harf-e-nafrat koī shamshīr-e-ġhazab ho jaise

tā-abad shahr-e-sitam jis se tabah ho jaa.eñ

itnā tārīk ki shamshān kī shab ho jaise

lab pe lā.ūñ to mire hoñT siyah ho jaa.eñ

aaj har sur se har ik raag kā naatā TuuTā

DhūñDtī phirtī hai mutrib ko phir us kī āvāz

joshish-e-dard se majnūñ ke garebāñ kī tarah

chāk-dar-chāk huā aaj har ik parda-e-sāz

aaj har mauj-e-havā se hai savālī ḳhilqat

lā koī naġhma koī saut tirī umr darāz

nauha-e-ġham hī sahī shor-e-shahādat hī sahī

sūr-e-mahshar hī sahī bāñg-e-qayāmat hī sahī

aaj ek harf ko phir DhunDta phirta hai KHayal

madh bhara harf koi zahr bhara harf koi

dil-nashin harf koi qahr bhara harf koi

harf-e-ulfat koi dildar-e-nazar ho jaise

jis se milti hai nazar bosa-e-lab ki surat

itna raushan ki sar-e-mauja-e-zar ho jaise

sohbat-e-yar mein aaghaz-e-tarab ki surat

harf-e-nafrat koi shamshir-e-ghazab ho jaise

ta-abad shahr-e-sitam jis se tabah ho jaen

itna tarik ki shamshan ki shab ho jaise

lab pe laun to mere honT siyah ho jaen

aaj har sur se har ek rag ka nata TuTa

DhunDti phirti hai mutrib ko phir us ki aawaz

joshish-e-dard se majnun ke gareban ki tarah

chaak-dar-chaak hua aaj har ek parda-e-saz

aaj har mauj-e-hawa se hai sawali KHilqat

la koi naghma koi saut teri umr daraaz

nauha-e-gham hi sahi shor-e-shahadat hi sahi

sur-e-mahshar hi sahi bang-e-qayamat hi sahi