aaj ki raat

dekhnā jazb-e-mohabbat kā asar aaj kī raat

mere shāne pe hai us shoḳh kā sar aaj kī raat

aur kyā chāhiye ab ai dil-e-majrūh tujhe

us ne dekhā to ba-andāz-e-digar aaj kī raat

phuul kyā ḳhaar bhī haiñ aaj gulistāñ-ba-kanār

sañg-reze haiñ nigāhoñ meñ guhar aaj kī raat

mahv-e-gulgasht hai ye kaun mire dosh-ba-dosh

kahkashāñ ban ga.ī har rāhguzar aaj kī raat

phuuT niklā dar-o-dīvār se sailāb-e-nashāt

allāh allāh mirā kaif-e-nazar aaj kī raat

shabnamistān-e-tajallī kā fusūñ kyā kahiye

chāñd ne pheñk diyā raḳht-e-safar aaj kī raat

nuur hī nuur hai kis samt uThā.ūñ āñhkeñ

husn hī husn hai tā-hadd-e-nazar aaj kī raat

qasr-e-gītī meñ umañD aayā hai tūfān-e-hayāt

maut larzāñ hai pas-e-parda-e-dar aaj kī raat

allāh allāh vo peshāni-e-sīmīñ kā jamāl

rah ga.ī jam ke sitāroñ kī nazar aaj kī raat

āriz-e-garm pe vo rañg-e-shafaq kī lahreñ

vo mirī shoḳh-nigāhī kā asar aaj kī raat

nargis-e-nāz meñ vo niiñd kā halkā sā ḳhumār

vo mire naġhma-e-shīrīñ kā asar aaj kī raat

naġhma o mai kā ye tūfān-e-tarab kyā kahiye

ghar mirā ban gayā 'ḳhayyām' kā ghar aaj kī raat

merī har saañs pe vo un kī tavajjoh kyā ḳhuub

merī har baat pe vo jumbish-e-sar aaj kī raat

vo tabassum hī tabassum kā jamāl-e-paiham

vo mohabbat hī mohabbat kī nazar aaj kī raat

uf vo vāraftagi-e-shauq meñ ik vahm-e-latīf

kapkapā.e hue hoñToñ pe nazar aaj kī raat

maz.hab-e-ishq meñ jaa.ez hai yaqīnan jaa.ez

chuum luuñ maiñ lab-e-la.alīñ bhī agar aaj kī raat

apnī rif.at pe jo nāzāñ haiñ to nāzāñ hī raheñ

kah do anjum se ki dekheñ na idhar aaj kī raat

un ke altāf kā itnā hī fusūñ kaafī hai

kam hai pahle se bahut dard-e-jigar aaj kī raat

dekhna jazb-e-mohabbat ka asar aaj ki raat

mere shane pe hai us shoKH ka sar aaj ki raat

aur kya chahiye ab ai dil-e-majruh tujhe

us ne dekha to ba-andaz-e-digar aaj ki raat

phul kya KHar bhi hain aaj gulistan-ba-kanar

sang-reze hain nigahon mein guhar aaj ki raat

mahw-e-gulgasht hai ye kaun mere dosh-ba-dosh

kahkashan ban gai har rahguzar aaj ki raat

phuT nikla dar-o-diwar se sailab-e-nashat

allah allah mera kaif-e-nazar aaj ki raat

shabnamistan-e-tajalli ka fusun kya kahiye

chand ne phenk diya raKHt-e-safar aaj ki raat

nur hi nur hai kis samt uThaun aanhken

husn hi husn hai ta-hadd-e-nazar aaj ki raat

qasr-e-giti mein umanD aaya hai tufan-e-hayat

maut larzan hai pas-e-parda-e-dar aaj ki raat

allah allah wo peshani-e-simin ka jamal

rah gai jam ke sitaron ki nazar aaj ki raat

aariz-e-garm pe wo rang-e-shafaq ki lahren

wo meri shoKH-nigahi ka asar aaj ki raat

nargis-e-naz mein wo nind ka halka sa KHumar

wo mere naghma-e-shirin ka asar aaj ki raat

naghma o mai ka ye tufan-e-tarab kya kahiye

ghar mera ban gaya 'KHayyam' ka ghar aaj ki raat

meri har sans pe wo un ki tawajjoh kya KHub

meri har baat pe wo jumbish-e-sar aaj ki raat

wo tabassum hi tabassum ka jamal-e-paiham

wo mohabbat hi mohabbat ki nazar aaj ki raat

uf wo waraftagi-e-shauq mein ek wahm-e-latif

kapkapae hue honTon pe nazar aaj ki raat

mazhab-e-ishq mein jaez hai yaqinan jaez

chum lun main lab-e-lalin bhi agar aaj ki raat

apni rifat pe jo nazan hain to nazan hi rahen

kah do anjum se ki dekhen na idhar aaj ki raat

un ke altaf ka itna hi fusun kafi hai

kam hai pahle se bahut dard-e-jigar aaj ki raat