dusra aasman

pahle din bādal zaḳhmī ho ga.e

dūsre din sitāre

aur tīsre din

bahut sī goliyāñ niile āsmān ko jā lagīñ

aur vo siyāh ho gayā

āñsuoñ kī tarah koī chiiz

zamīn par girne lagī

kabhī ḳhāmoshī ke saath bahut saarī būñdeñ

aur kabhī saḌak par shor machātā huā

moslā-dhār paanī

zaḳhmī āsmān

burī tarah ro rahā thā

us ne apnā chehra

bahut saare bādaloñ se Dhakā huā thā

ham use hañsāne kī koshish meñ bāhar nikalte

to bārish aur tez ho jaatī

siyāh aur maTyālī kīchaḌ apne jūtoñ meñ lagā.e

ham phir ghar meñ aa jaate

āsmān ke aañsū

qālīn meñ jazb ho jaate

yā hamāre kapḌoñ ke saath saare ghar meñ phail jaate

pakke farsh par hamāre kīchaḌ bhare pairoñ ke nishān

āsmān ke zaḳhmoñ kī tarah

kabhī halke aur kabhī gahre ho jaate

āsmān kī taraf jaane vaalī duā.eñ

tez bārish ke saath vāpas aa kar

giilī miTTī meñ ġhā.eb ho jātīñ

chhoTī chhoTī chhatriyāñ

āsmān kī yā hamārī qismat ke liye nā-kāfī thiiñ

aise mausam meñ thoḌī der ke liye

agar vo firing band kar dete

to shāyad hamārī tarah

āsmān bhī achchhā ho jaatā

pahle se ziyāda niilā aur chamakdār

pahle din baadal zaKHmi ho gae

dusre din sitare

aur tisre din

bahut si goliyan nile aasman ko ja lagin

aur wo siyah ho gaya

aansuon ki tarah koi chiz

zamin par girne lagi

kabhi KHamoshi ke sath bahut sari bunden

aur kabhi saDak par shor machata hua

mosla-dhaar pani

zaKHmi aasman

buri tarah ro raha tha

us ne apna chehra

bahut sare baadalon se Dhaka hua tha

hum use hansane ki koshish mein bahar nikalte

to barish aur tez ho jati

siyah aur maTyali kichaD apne juton mein lagae

hum phir ghar mein aa jate

aasman ke aansu

qalin mein jazb ho jate

ya hamare kapDon ke sath sare ghar mein phail jate

pakke farsh par hamare kichaD bhare pairon ke nishan

aasman ke zaKHmon ki tarah

kabhi halke aur kabhi gahre ho jate

aasman ki taraf jaane wali duaen

tez barish ke sath wapas aa kar

gili miTTi mein ghaeb ho jatin

chhoTi chhoTi chhatriyan

aasman ki ya hamari qismat ke liye na-kafi thin

aise mausam mein thoDi der ke liye

agar wo firing band kar dete

to shayad hamari tarah

aasman bhi achchha ho jata

pahle se ziyaada nila aur chamakdar