fitrat ek muflis ki nazar mein

fitrat ke pujārī kuchh to batā kyā husn hai in gulzāroñ meñ

hai kaun sī rānā.ī āḳhir in phūloñ meñ in ḳhāroñ meñ

vo ḳhvāh sulagte hoñ shab bhar vo ḳhvāh chamakte hoñ shab bhar

maiñ ne bhī to dekhā hai aksar kyā baat na.ī hai tāroñ meñ

is chāñd kī ThanDī kirnoñ se mujh ko to sukūñ hotā hī nahīñ

mujh ko to junūñ hotā hī nahīñ jab phirtā huuñ gulzāroñ meñ

ye chup chup nargis kī kaliyāñ kyā jaane kaisī kaliyāñ haiñ

jo khiltī haiñ jo hañstī haiñ aur phir bhī haiñ bīmāroñ meñ

ye laal shafaq ye lāla-o-gul ik chiñgārī bhī jin meñ nahīñ

shole bhī nahīñ garmī bhī nahīñ in tere ātish-zāroñ meñ

us vaqt kahāñ tū hotā hai jab mausam-e-garmā kā sūraj

dozaḳh kī tapish bhar detā hai dariyāoñ meñ kohsāroñ meñ

jaaḌe kī bhayānak rātoñ meñ vo sard havāoñ kī tezī

haañ vo tezī vo be-mehrī jo hotī hai talvāroñ meñ

dariyā ke talātum kā manzar haañ tujh ko mubārak ho lekin

ik TuuTī phūTī kashtī bhī chakrātī hai mañjdhāroñ meñ

koyal ke rasīle giit sune lekin ye kabhī sochā tū ne

haiñ uljhe hue naġhme kitne ik saaz ke TuuTe tāroñ meñ

bādal kī garaj bijlī kī chamak bārish meñ vo tezī tīroñ kī

maiñ ThiThurā simTā saḌkoñ par tū jām-ba-lab mai-ḳhvāroñ meñ

sab hosh o ḳhirad ke dushman haiñ sab qalb o nazar ke rahzan haiñ

rakkhā hai bhalā kyā is ke sivā in rāhat-e-jāñ mah-pāroñ meñ

vo laakh hilāloñ se bhī hasīñ kaisī zohra kaisī parvīñ

ik roTī kā TukḌā jo kahīñ mil jaa.e mujhe bāzāroñ meñ

jab jeb meñ paise bajte haiñ jab peT meñ roTī hotī hai

us vaqt ye zarra hiirā hai us vaqt ye shabnam motī hai

fitrat ke pujari kuchh to bata kya husn hai in gulzaron mein

hai kaun si ranai aaKHir in phulon mein in KHaron mein

wo KHwah sulagte hon shab bhar wo KHwah chamakte hon shab bhar

main ne bhi to dekha hai aksar kya baat nai hai taron mein

is chand ki ThanDi kirnon se mujh ko to sukun hota hi nahin

mujh ko to junun hota hi nahin jab phirta hun gulzaron mein

ye chup chup nargis ki kaliyan kya jaane kaisi kaliyan hain

jo khilti hain jo hansti hain aur phir bhi hain bimaron mein

ye lal shafaq ye lala-o-gul ek chingari bhi jin mein nahin

shole bhi nahin garmi bhi nahin in tere aatish-zaron mein

us waqt kahan tu hota hai jab mausam-e-garma ka suraj

dozaKH ki tapish bhar deta hai dariyaon mein kohsaron mein

jaDe ki bhayanak raaton mein wo sard hawaon ki tezi

han wo tezi wo be-mehri jo hoti hai talwaron mein

dariya ke talatum ka manzar han tujh ko mubarak ho lekin

ek TuTi phuTi kashti bhi chakraati hai manjdhaaron mein

koyal ke rasile git sune lekin ye kabhi socha tu ne

hain uljhe hue naghme kitne ek saz ke TuTe taron mein

baadal ki garaj bijli ki chamak barish mein wo tezi tiron ki

main ThiThura simTa saDkon par tu jam-ba-lab mai-KHwaron mein

sab hosh o KHirad ke dushman hain sab qalb o nazar ke rahzan hain

rakkha hai bhala kya is ke siwa in rahat-e-jaan mah-paron mein

wo lakh hilalon se bhi hasin kaisi zohra kaisi parwin

ek roTi ka TukDa jo kahin mil jae mujhe bazaron mein

jab jeb mein paise bajte hain jab peT mein roTi hoti hai

us waqt ye zarra hira hai us waqt ye shabnam moti hai