ghalat theatre

baḌā stage

surḳh maḳhmalīñ parde ke aage

charlie chaplin kī naql karte hue

ḳhudā ne ġhā.ebāna taur par maujūd shā.eqīn kā shukriya adā kiyā

zindagī ko bahut qarīb se dikhā kar ḳhudā

apnā aap manvā chukā hai

musalsal tāliyoñ kī guuñj ne

bazāhir

māhaul banā diyā lekin

dar-parda dāhinī dīvār se paivasta

kursiyoñ kī lambī qatār lagī hai

izrā.īl sūrat-e-intizār-e-dā.im nahīf rūhoñ par

chābuk chalā rahā hai

ḳhudā ke naam par tāliyāñ baj rahī haiñ

background meñ maġhribī mausīqī bah rahī hai

'ajab kashmakash meñ mubtalā haiñ

ye jiine kī chaah meñ baiThe hue log

maiñ sust-mizāj zindagī ke theatre meñ tāḳhīr se pahuñchā

sabhī nashisteñ pur haiñ

ticket-farosh kī āñkheñ ġhair-tarāshe nāḳhun kī tarah

mere chehre meñ chubh rahī haiñ

maiñ ġhalat theatre meñ aa gayā huuñ

merī film kahīñ aur release honī thī

baDa stage

surKH maKHmalin parde ke aage

charlie chaplin ki naql karte hue

KHuda ne ghaebana taur par maujud shaeqin ka shukriya ada kiya

zindagi ko bahut qarib se dikha kar KHuda

apna aap manwa chuka hai

musalsal taliyon ki gunj ne

bazahir

mahaul bana diya lekin

dar-parda dahini diwar se paiwasta

kursiyon ki lambi qatar lagi hai

izrail surat-e-intizar-e-daim nahif ruhon par

chabuk chala raha hai

KHuda ke nam par taliyan baj rahi hain

background mein maghribi mausiqi bah rahi hai

'ajab kashmakash mein mubtala hain

ye jine ki chah mein baiThe hue log

main sust-mizaj zindagi ke theatre mein taKHir se pahuncha

sabhi nashisten pur hain

ticket-farosh ki aankhen ghair-tarashe naKHun ki tarah

mere chehre mein chubh rahi hain

main ghalat theatre mein aa gaya hun

meri film kahin aur release honi thi