kali diwar

kal washington shahr kī ham ne sair bahut kī yaar

guuñj rahī thī sab duniyā meñ jis kī jai-jai-kār

mulkoñ mulkoñ ham ghūme the banjāroñ kī misl

lekin is kī saj-dhaj sach-much dil-dāroñ kī misl

raushniyoñ ke rañg baheñ yuuñ rasta nazar na aa.e

man kī āñkhoñ vaalā bhī yaañ andhā ho ho jaa.e

ūñche baam charāġhāñ raste rūp-bhare bāzār

jāgtī āñkhoñ se dekhā hai ḳhvāboñ kā sansār

ek safed imārat jis kī nagar nagar meñ dhuum

andar duniyā bhar kī kālak bāhar se ma.asūm

yahī safed imārat jis meñ bahut baḌī sarkār

yahīñ kareñ saudāgar chhoTī qaumoñ kā bevpār

yahīñ pe jādū-gar baiThā jab kahīñ kī Dor hilā.e

har bastī nagasaki hiroshima ban jaa.e

isī imārat se kuchh duur hī ik kaalī dīvār

logoñ kā mela aisā lagā thā jaise koī tyauhār

is kaalī dīvār pe kanda dekhe hazāroñ naam

un nāmoñ ke biich likhā thā shohdā-e-vietnam

ās-pās to jam.a huā thā ḳhilqat kā amboh

sab kī āñkhoñ meñ sannāTā chehroñ par andoh

bekal bahneñ ghāyal maa.eñ aur dukhī bevāyeñ

sājan tum kis des sidhāre socheñ mahbūbā.eñ

apne pyāroñ dil-dāroñ kā ojhal mukhḌā DhūñDeñ

is kaalī dīvār pe un ke naam kā TukḌā DhūñDeñ

diloñ meñ dukh āñkhoñ meñ shabnam hāthoñ meñ phuul uThā.e

is nāmoñ ke qabristān kā bhed koī kyā paa.e

nā turbat nā katba koī nā haDDī nā maas

phir bhī pāgal naināñ ko thī piyā milan kī aas

kahīñ kahīñ is kaalī sil par koī safed gulāb

yuuñ be-tāb paḌā thā jaise andhī aañkh kā ḳhvāb

kāñTā ban kar sabhī ke dil meñ khaTke ek savāl

kis kāran miTTī meñ milā.e hīroñ jaise laal

Ho-chi-minh ke des meñ ham ne kyā kyā sitam na Dhaa.e

us ke jiyāle to āzādī kā sūraj le aa.e

lekin itne chāñd gañvā kar ham ne bhalā kyā paayā

ham bad-qismat aise jin ko dhuup milī nā saayā

mukh motī de kar hāsil kī ye kaalī dīvār

ye kaalī dīvār jo hai bas ik ḳhālī dīvār

ye kaalī dīvār jo hai nāmoñ kā qabristān

washington ke shahr meñ dafn haiñ kis kis ke armān

kal washington shahr ki hum ne sair bahut ki yar

gunj rahi thi sab duniya mein jis ki jai-jai-kar

mulkon mulkon hum ghume the banjaron ki misl

lekin is ki saj-dhaj sach-much dil-daron ki misl

raushniyon ke rang bahen yun rasta nazar na aae

man ki aankhon wala bhi yan andha ho ho jae

unche baam charaghan raste rup-bhare bazar

jagti aankhon se dekha hai KHwabon ka sansar

ek safed imarat jis ki nagar nagar mein dhum

andar duniya bhar ki kalak bahar se masum

yahi safed imarat jis mein bahut baDi sarkar

yahin karen saudagar chhoTi qaumon ka bewpar

yahin pe jadu-gar baiTha jab kahin ki Dor hilae

har basti nagasaki hiroshima ban jae

isi imarat se kuchh dur hi ek kali diwar

logon ka mela aisa laga tha jaise koi tyauhaar

is kali diwar pe kanda dekhe hazaron nam

un namon ke bich likha tha shohda-e-wietnam

aas-pas to jama hua tha KHilqat ka amboh

sab ki aankhon mein sannaTa chehron par andoh

bekal bahnen ghayal maen aur dukhi bewayen

sajan tum kis des sidhaare sochen mahbubaen

apne pyaron dil-daron ka ojhal mukhDa DhunDen

is kali diwar pe un ke nam ka TukDa DhunDen

dilon mein dukh aankhon mein shabnam hathon mein phul uThae

is namon ke qabristan ka bhed koi kya pae

na turbat na katba koi na haDDi na mas

phir bhi pagal nainan ko thi piya milan ki aas

kahin kahin is kali sil par koi safed gulab

yun be-tab paDa tha jaise andhi aankh ka KHwab

kanTa ban kar sabhi ke dil mein khaTke ek sawal

kis karan miTTi mein milae hiron jaise lal

Ho-chi-minh ke des mein hum ne kya kya sitam na Dhae

us ke jiyale to aazadi ka suraj le aae

lekin itne chand ganwa kar hum ne bhala kya paya

hum bad-qismat aise jin ko dhup mili na saya

mukh moti de kar hasil ki ye kali diwar

ye kali diwar jo hai bas ek KHali diwar

ye kali diwar jo hai namon ka qabristan

washington ke shahr mein dafn hain kis kis ke arman