maika

maiñ ne chāhā thā koī ujāle sā haath

merī uñglī pakaḌ kar mujhe aage baḌhnā sikhā.e

madrasoñ daftaroñ shāh-rāhoñ makānoñ dūkānoñ

talak le chale

lekin aisā huā

jis jagah āñkheñ kholī thī maiñ ne

vahāñ haath saare roTī banāne pe māmūr the

ḳhauf aatā thā ghar se nikalte hue

Dagmagāte qadam

guñg alfāz

bebas nigāheñ liye

aage baḌhtī thī maiñ

chūñki ruknā koī hal nahīñ thā

so maiñ apnī galī se nikal kar jahāñ bhī ga.ī

ajnabī merī sahmī huī zaat pe

Darte Darte adā hotī har baat pe

fiqre kaste rahe

aur hañste rahe

tab se ab tak nahīñ yaad

kitne hī dariyā bahe

kab gulābī badan sāñvlā ho gayā

ujlī be-dāġh āñkhoñ meñ

kab dard ke zard mausam utar aa.e

kab aa.ina dhuul se bhar gayā

lekin ab daftaroñ shāh-rāhoñ makānoñ dūkānoñ meñ

jaate hue ḳhauf aatā nahīñ

āsmānoñ ko chhūtī imārāt se

ajnabī sar-zamīnoñ se

ūñche qadoñ

tez-raftār dariyāoñ se ḳhauf aatā nahīñ

ab maiñ chaltī huuñ to mere hamrāh chaltī haiñ nazmeñ mirī

maañ se nazmeñ

bhaa.ī se nazmeñ

vaqt

tū ne jo merā gulābī badan sāñvlā kar

ujāloñ sī nazmeñ mujhe dī haiñ

terā bahut shukriya

main ne chaha tha koi ujale sa hath

meri ungli pakaD kar mujhe aage baDhna sikhae

madrason daftaron shah-rahon makanon dukanon

talak le chale

lekin aisa hua

jis jagah aankhen kholi thi main ne

wahan hath sare roTi banane pe mamur the

KHauf aata tha ghar se nikalte hue

Dagmagate qadam

gung alfaz

bebas nigahen liye

aage baDhti thi main

chunki rukna koi hal nahin tha

so main apni gali se nikal kar jahan bhi gai

ajnabi meri sahmi hui zat pe

Darte Darte ada hoti har baat pe

fiqre kaste rahe

aur hanste rahe

tab se ab tak nahin yaad

kitne hi dariya bahe

kab gulabi badan sanwla ho gaya

ujli be-dagh aankhon mein

kab dard ke zard mausam utar aae

kab aaina dhul se bhar gaya

lekin ab daftaron shah-rahon makanon dukanon mein

jate hue KHauf aata nahin

aasmanon ko chhuti imaraat se

ajnabi sar-zaminon se

unche qadon

tez-raftar dariyaon se KHauf aata nahin

ab main chalti hun to mere hamrah chalti hain nazmen meri

man se nazmen

bhai se nazmen

waqt

tu ne jo mera gulabi badan sanwla kar

ujalon si nazmen mujhe di hain

tera bahut shukriya