mohabbat ki ek nazm

mohabbat kī ek nazm

agar kabhī merī yaad aa.e

to chāñd rātoñ kī narm dil-gīr raushnī meñ

kisī sitāre ko dekh lenā

agar vo naḳhl-e-falak se uḌ kar

tumhāre qadmoñ meñ aa gire

to ye jaan lenā vo isti.āra thā mere dil kā

agar na aa.e

magar ye mumkin hī kis tarah hai

ki tum kisī par nigāh Daalo

to us kī dīvār-e-jāñ na TuuTe

vo apnī hastī na bhuul jaa.e

agar kabhī merī yaad aa.e

gurez kartī havā kī lahroñ pe haath rakhnā

maiñ ḳhushbuoñ meñ tumheñ milūñgā

mujhe gulāboñ kī pattiyoñ meñ talāsh karnā

maiñ os-qatroñ ke ā.īnoñ meñ tumheñ milūñgā

agar sitāroñ meñ os-qatroñ meñ ḳhushbuoñ meñ na paao mujh ko

to apne qadmoñ meñ dekh lenā maiñ gard hotī masāfatoñ meñ tumheñ milūñgā

kahīñ pe raushan charāġh dekho

to jaan lenā ki har patañge ke saath maiñ bhī bikhar chukā huuñ

tum apne hāthoñ se un patañgoñ kī ḳhaak dariyā meñ Daal denā

maiñ ḳhaak ban kar samundaroñ meñ safar karūñgā

kisī na dekhe hue jazīre pe

ruk ke tum ko sadā.eñ dūñgā

samundaroñ ke safar pe niklo

to us jazīre pe bhī utarnā

mohabbat ki ek nazm

agar kabhi meri yaad aae

to chand raaton ki narm dil-gir raushni mein

kisi sitare ko dekh lena

agar wo naKHl-e-falak se uD kar

tumhaare qadmon mein aa gire

to ye jaan lena wo istiara tha mere dil ka

agar na aae

magar ye mumkin hi kis tarah hai

ki tum kisi par nigah Dalo

to us ki diwar-e-jaan na TuTe

wo apni hasti na bhul jae

agar kabhi meri yaad aae

gurez karti hawa ki lahron pe hath rakhna

main KHushbuon mein tumhein milunga

mujhe gulabon ki pattiyon mein talash karna

main os-qatron ke aainon mein tumhein milunga

agar sitaron mein os-qatron mein KHushbuon mein na pao mujh ko

to apne qadmon mein dekh lena main gard hoti masafaton mein tumhein milunga

kahin pe raushan charagh dekho

to jaan lena ki har patange ke sath main bhi bikhar chuka hun

tum apne hathon se un patangon ki KHak dariya mein Dal dena

main KHak ban kar samundaron mein safar karunga

kisi na dekhe hue jazire pe

ruk ke tum ko sadaen dunga

samundaron ke safar pe niklo

to us jazire pe bhi utarna