nazm

tū kisī aur hī duniyā meñ milī thī mujh se

tū kisī aur hī manzar kī mahak laa.ī thī

Dar rahā thā ki kahīñ zaḳhm na bhar jaa.eñ mire

aur tū muTThiyāñ bhar bhar ke namak laa.ī thī

aur hī tarh kī āñkheñ thiiñ tire chehre par

tū kisī aur sitāre se chamak laa.ī thī

terī āvāz hī sab kuchh thī mujhe monis-e-jāñ

kyā karūñ maiñ ki tū bolī hī bahut kam mujh se

terī chup se hī ye mahsūs kiyā thā maiñ ne

jiit jā.egā kisī roz tirā ġham mujh se

shahr āvāzeñ lagātā thā magar tū chup thī

ye ta'alluq mujhe khātā thā magar tū chup thī

vahī anjām thā jo 'ishq kā āġhāz se hai

tujh ko paayā bhī nahīñ thā ki tujhe khonā thā

chalī aatī hai yahī rasm ka.ī sadiyoñ se

yahī hotā hai yahī hogā yahī honā thā

pūchhtā rahtā thā tujh se ki batā kyā dukh hai

aur mirī aañkh meñ aañsū bhī nahīñ hote the

maiñ ne andāze lagā.e ki sabab kyā hogā

par mire tiir tarāzū bhī nahīñ hote the

jis kā Dar thā mujhe mā'lūm paḌā logoñ se

phir vo ḳhush-baḳht palaT aaya tirī duniyā meñ

jis ke jaane pe mujhe tū ne jagah dī dil meñ

merī qismat meñ hī jab ḳhālī jagah likkhī thī

tujh se shikva bhī agar kartā to kaise kartā

maiñ vo sabza thā jise rauñd diyā jaatā hai

maiñ vo jangal thā jise kaaT diyā jaatā hai

maiñ vo dar thā jise dastak kī kamī khātī hai

maiñ vo manzil thā jahāñ TuuTī saḌak jaatī hai

maiñ vo ghar thā jise ābād nahīñ kartā koī

maiñ to vo thā ki jise yaad nahīñ kartā koī

ḳhair is baat ko tū chhoḌ batā kaisī hai

tū ne chāhā thā jise vo tire nazdīk to hai

kaun se ġham ne tujhe chaaT liyā andar se

āj-kal phir se tū chup rahtī hai sab Thiik to hai

tu kisi aur hi duniya mein mili thi mujh se

tu kisi aur hi manzar ki mahak lai thi

Dar raha tha ki kahin zaKHm na bhar jaen mere

aur tu muTThiyan bhar bhar ke namak lai thi

aur hi tarh ki aankhen thin tere chehre par

tu kisi aur sitare se chamak lai thi

teri aawaz hi sab kuchh thi mujhe monis-e-jaan

kya karun main ki tu boli hi bahut kam mujh se

teri chup se hi ye mahsus kiya tha main ne

jit jaega kisi roz tera gham mujh se

shahr aawazen lagata tha magar tu chup thi

ye ta'alluq mujhe khata tha magar tu chup thi

wahi anjam tha jo 'ishq ka aaghaz se hai

tujh ko paya bhi nahin tha ki tujhe khona tha

chali aati hai yahi rasm kai sadiyon se

yahi hota hai yahi hoga yahi hona tha

puchhta rahta tha tujh se ki bata kya dukh hai

aur meri aankh mein aansu bhi nahin hote the

main ne andaze lagae ki sabab kya hoga

par mere tir taraazu bhi nahin hote the

jis ka Dar tha mujhe ma'lum paDa logon se

phir wo KHush-baKHt palaT aaya teri duniya mein

jis ke jaane pe mujhe tu ne jagah di dil mein

meri qismat mein hi jab KHali jagah likkhi thi

tujh se shikwa bhi agar karta to kaise karta

main wo sabza tha jise raund diya jata hai

main wo jangal tha jise kaT diya jata hai

main wo dar tha jise dastak ki kami khati hai

main wo manzil tha jahan TuTi saDak jati hai

main wo ghar tha jise aabaad nahin karta koi

main to wo tha ki jise yaad nahin karta koi

KHair is baat ko tu chhoD bata kaisi hai

tu ne chaha tha jise wo tere nazdik to hai

kaun se gham ne tujhe chaT liya andar se

aaj-kal phir se tu chup rahti hai sab Thik to hai