nazm

mohabbat pesh-qadmī kartī hai

aur apnī fauj meñ

kisī sipāhī ko bhartī nahīñ kartī

kisī tank ko apne saath nahīñ rakhtī

koī baktar-band gaaḌī yā top-ḳhāna

apnī hifāzat ke liye istimāl nahīñ kartī

kisī tayyāre se

maidān-e-jañg kā jā.eza nahīñ letī

mohabbat pesh-qadmī kartī hai

aur saarī duniyā ke tiir

zahr meñ bujhā liye jaate haiñ

saare neza-bāz

ghaat lagā ke baiTh jaate haiñ

saarī talvāreñ

niyām se bāhar aa jaatī haiñ

use apnī Tāpoñ tale rauñdne ke liye

shah-savār tayyār ho jaate haiñ

bādshāhoñ kā ġhussa

kaalī āñdhī ban ke

us taraf baḌhne lagtā hai

apne dil pe haath rakh ke

mohabbat pesh-qadmī kartī hai

aur us kā jahāz

kabhī ġharq nahīñ hotā

us kā aslaha kabhī ḳhatm nahīñ hotā

mohabbat kī hamesha jaarī rahne vaalī

ye pesh-qadmī koī rok nahīñ paatā

thak-hār ke us ke saath saath chalne lagtā hai

mohabbat pesh-qadmi karti hai

aur apni fauj mein

kisi sipahi ko bharti nahin karti

kisi tank ko apne sath nahin rakhti

koi baktar-band gaDi ya top-KHana

apni hifazat ke liye istimal nahin karti

kisi tayyare se

maidan-e-jang ka jaeza nahin leti

mohabbat pesh-qadmi karti hai

aur sari duniya ke tir

zahr mein bujha liye jate hain

sare neza-baz

ghat laga ke baiTh jate hain

sari talwaren

niyam se bahar aa jati hain

use apni Tapon tale raundne ke liye

shah-sawar tayyar ho jate hain

baadshahon ka ghussa

kali aandhi ban ke

us taraf baDhne lagta hai

apne dil pe hath rakh ke

mohabbat pesh-qadmi karti hai

aur us ka jahaz

kabhi gharq nahin hota

us ka aslaha kabhi KHatm nahin hota

mohabbat ki hamesha jari rahne wali

ye pesh-qadmi koi rok nahin pata

thak-haar ke us ke sath sath chalne lagta hai