qatre

hameñ kaun bachā.egā

agar kabhī hamārī jebeñ

ḳhālī karāne kī koshish kī ga.ī

agar kabhī hamārī uñgliyoñ ke darmiyān

pencil rakh kar aur unheñ dabā dabā kar

kuchh pūchhne kī zarūrat mahsūs hotī

to ham kyā batā.eñge

yahī ki ham ne kabhī chand khoTe sikkoñ

chamḌe meñ chhupe tāvīz

aur khajūr kī guThliyoñ ke sivā

zamīn meñ kuchh nahīñ dabāyā

yā ye ki hamārī almārī ke ḳhānoñ meñ

mansūḳh-shuda passport

chand ḳhāndānī albamoñ

aur aqiiq kī añgūThiyoñ ke sivā

kuchh maujūd nahīñ

magar ye hamārā ḳhayāl hai sirf ḳhayāl

hameñ kuchh nahīñ hogā

aur agar kuchh huā

to hamāre dost daraḳht hameñ

apne saa.e meñ le leñge

jin bādaloñ kī tashkīl meñ

hamāre aañsū shāmil haiñ

hameñ saath le jā.eñge

aur nīche nahīñ girne deñ

agar kabhī be-dhyānī ke aalam meñ

ham nīche shahr meñ gire bhī

to hamārī jeboñ se

chhoTe chhoTe sitāroñ ber bahūTiyoñ

aur bārish ke qatroñ ke sivā

kuchh barāmad na hogā

hamein kaun bachaega

agar kabhi hamari jeben

KHali karane ki koshish ki gai

agar kabhi hamari ungliyon ke darmiyan

pencil rakh kar aur unhen daba daba kar

kuchh puchhne ki zarurat mahsus hoti

to hum kya bataenge

yahi ki hum ne kabhi chand khoTe sikkon

chamDe mein chhupe tawiz

aur khajur ki guThliyon ke siwa

zamin mein kuchh nahin dabaya

ya ye ki hamari almari ke KHanon mein

mansuKH-shuda passport

chand KHandani albamon

aur aqiq ki anguThiyon ke siwa

kuchh maujud nahin

magar ye hamara KHayal hai sirf KHayal

hamein kuchh nahin hoga

aur agar kuchh hua

to hamare dost daraKHt hamein

apne sae mein le lenge

jin baadalon ki tashkil mein

hamare aansu shamil hain

hamein sath le jaenge

aur niche nahin girne den

agar kabhi be-dhyani ke aalam mein

hum niche shahr mein gire bhi

to hamari jebon se

chhoTe chhoTe sitaron ber bahuTiyon

aur barish ke qatron ke siwa

kuchh baramad na hoga