aa jaana

fazā meñ dard-āgīñ giit lahrā.e to aa jaanā

sukūt-e-shab meñ koī aah tharrā.e to aa jaanā

jahāñ kā zarra zarra yaas barsā.e to aa jaanā

dar-o-dīvār par andoh chhā jaa.e to aa jaanā

samajh lenā koī ro ro ke tujh ko yaad kartā hai

samajh lenā koī ġham kā jahāñ ābād kartā hai

koī taqdīr kā maarā huā fariyād kartā hai

tirī āñkhoñ meñ ashk-e-ġham utar aa.e to aa jaanā

diloñ ko gudgudā.e jab tarannum ābshāroñ kā

ghaTā barsāt kī jab chuum le muñh kohsāroñ kā

mulāqātoñ ke jab din hoñ zamāna ho bahāroñ kā

bahār-e-gul mulāqātoñ pe uksā.e to aa jaanā

zamāna mushkiloñ ke jaal phailā.e to phailā.e

qadam baḌhte raheñ be-dard duniyā laakh bahkā.e

samajhte haiñ kahīñ dīvāngān-e-ishq samjhā.e

tire hoñToñ pe merā naam aa jaa.e to aa jaanā

jhaḌī barsāt kī jab aag tan man meñ lagātī ho

guloñ ko bulbul-e-nāshād hāl-e-dil sunātī ho

koī birhan kisī kī yaad meñ aañsū bahātī ho

agar aise meñ terā dil dhaḌak jaa.e to aa jaanā

faza mein dard-agin git lahrae to aa jaana

sukut-e-shab mein koi aah tharrae to aa jaana

jahan ka zarra zarra yas barsae to aa jaana

dar-o-diwar par andoh chha jae to aa jaana

samajh lena koi ro ro ke tujh ko yaad karta hai

samajh lena koi gham ka jahan aabaad karta hai

koi taqdir ka mara hua fariyaad karta hai

teri aankhon mein ashk-e-gham utar aae to aa jaana

dilon ko gudgudae jab tarannum aabshaaron ka

ghaTa barsat ki jab chum le munh kohsaron ka

mulaqaton ke jab din hon zamana ho bahaaron ka

bahaar-e-gul mulaqaton pe uksae to aa jaana

zamana mushkilon ke jal phailae to phailae

qadam baDhte rahen be-dard duniya lakh bahkae

samajhte hain kahin diwangan-e-ishq samjhae

tere honTon pe mera nam aa jae to aa jaana

jhaDi barsat ki jab aag tan man mein lagati ho

gulon ko bulbul-e-nashad haal-e-dil sunati ho

koi birhan kisi ki yaad mein aansu bahati ho

agar aise mein tera dil dhaDak jae to aa jaana