shisha ka aadmi

uThāo haath ki dast-e-duā buland kareñ

hamārī umar kā ik aur din tamām huā

ḳhudā kā shukr bajā laa.eñ aaj ke din bhī

na koī vāqi.a guzrā na aisā kaam huā

zabāñ se kalma-e-haq-rāst kuchh kahā jaatā

zamīr jāgtā aur apnā imtihāñ hotā

ḳhudā kā shukr bajā laa.eñ aaj kā din bhī

usī tarah se kaTā muñh-añdhere uTh baiThe

pyālī chaa.e kī pī ḳhabreñ dekhīñ nāshta par

subūt baiThe basīrat kā apnī dete rahe

ba-ḳhair o ḳhūbī palaT aa.e jaise shaam huī

aur agle roz kā mauhūm ḳhauf dil meñ liye

Dare Dare se zarā baal paḌ na jaa.e kahīñ

liye diye yūñhī bistar meñ jā ke leT ga.e

uThao hath ki dast-e-dua buland karen

hamari umar ka ek aur din tamam hua

KHuda ka shukr baja laen aaj ke din bhi

na koi waqia guzra na aisa kaam hua

zaban se kalma-e-haq-rast kuchh kaha jata

zamir jagta aur apna imtihan hota

KHuda ka shukr baja laen aaj ka din bhi

usi tarah se kaTa munh-andhere uTh baiThe

pyali chae ki pi KHabren dekhin nashta par

subut baiThe basirat ka apni dete rahe

ba-KHair o KHubi palaT aae jaise sham hui

aur agle roz ka mauhum KHauf dil mein liye

Dare Dare se zara baal paD na jae kahin

liye diye yunhi bistar mein ja ke leT gae