ḳhidmat se ustād kī rahtā hai jo duur

chehre par us ke nahīñ achchhā.ī kā nuur

KHidmat se ustad ki rahta hai jo dur

chehre par us ke nahin achchhai ka nur

kyā nādāñ se dostī kyā daanā se bair

donoñ aise kaam haiñ jin meñ nahīñ hai ḳhair

kya nadan se dosti kya dana se bair

donon aise kaam hain jin mein nahin hai KHair

ammī hoñgī muntazir aur kahīñ mat jaao

chhūTo jab schōl se sīdhe ghar ko aao

ammi hongi muntazir aur kahin mat jao

chhuTo jab school se sidhe ghar ko aao

dushman bhī hairān hai kar ke laakh bigāḌ

terī marzī ke binā hiltā nahīñ pahāḌ

dushman bhi hairan hai kar ke lakh bigaD

teri marzi ke bina hilta nahin pahaD

zaat paat aur dharm kī Thiik nahīñ takrār

bhuul ga.e kyoñ aaj ham sadiyoñ kā vo pyaar

zat pat aur dharm ki Thik nahin takrar

bhul gae kyon aaj hum sadiyon ka wo pyar

gaalī denā paap hai Thiik nahīñ tauhīn

auroñ ko kar ke dukhī ḳhud hoge ġhamgīn

gali dena pap hai Thik nahin tauhin

auron ko kar ke dukhi KHud hoge ghamgin

jo raah kī achchhī hai udhar jaatā hai

bach kar vo burā.ī se guzar jaatā hai

paḌh kar hī to aatā hai salīqa bachcho

tā'līm se insān sudhar jaatā hai

jo rah ki achchhi hai udhar jata hai

bach kar wo burai se guzar jata hai

paDh kar hi to aata hai saliqa bachcho

ta'lim se insan sudhar jata hai

ban kar aa.e āḳhirī jag meñ aap rasūl

pesh kiye haiñ aap ne achchhe nek usuul

ban kar aae aaKHiri jag mein aap rasul

pesh kiye hain aap ne achchhe nek usul

saa.il ko dhutkārnā baat nahīñ hai Thiik

dar par aa.e jab gadā de denā kuchh bhiik

sail ko dhutkarna baat nahin hai Thik

dar par aae jab gada de dena kuchh bhik

manjan yā misvāk se rakkhoge gar saaf

daañt chamakte pāoge motī se shaffāf

manjan ya miswak se rakkhoge gar saf

dant chamakte paoge moti se shaffaf