علی سردار جعفری کے افسانے

چہرو مانجھی

اس کہانی میں غربت و افلاس کے نتیجے میں پیدا ہونے والے حالات کی عکاسی کی گئی ہے۔ بنگال کے ساحلی علاقے کی پروردہ چہرو تیرہ دن کے فاقے کے بعد ایک سیر چاول کے لئے اپنا جسم بیچ دیتی ہے اور پھر یہ سلسلہ چل نکلتا ہے اور وہ اپنے جسم کا سودا کرتی ہی رہتی ہے۔ حالات ایسے بن جاتے ہیں کہ اسے سفید پوشوں پر رعب جمانے اور اپنا غصہ نکالنے کا موقع ملتا رہتا ہے لیکن ان تمام باتوں کے باوجود اس کے دل میں اپنی اصل کی طرف مراجعت کی خواہش بیدار رہتی ہے۔ اسی لئے وہ گنیش مچھوارے کی محبت کو اپنے دل میں زندہ رکھتی ہے۔

آؤ ہم اس دنیا سے نکل چلیں

یہ ایک تمثیلی کہانی ہے جس میں محبوب اپنی محبوبہ سے کہتا ہے، آؤ اس مکار اور فریبی دنیا سے باہر کہیں دور نکل چلیں۔ یہ دنیا جس کے ہر ہر پہلو میں شر اور فساد ہے، اس سے دور کہیں اپنا آشیانہ بنائیں اور اپنے سینوں کو محبت سے بھر لیں اور اسی جگہ لوٹ چلیں جہاں سے ہم آئے ہیں۔

لچھمی

مزدوروں کے استحصال پر تعمیر کی گئی اس کہانی کا خاموش کردار لچھمی ہے۔ جو عین شباب میں بیوہ ہونے کے بعد ایک کارخانے کے مالک کی ہوس کا شکار ہوئی تھی۔ مزدوروں نے اس سانحہ پر غم و غصے میں زبردست ہڑتال کی اور کارخانے کو آگ لگا دی تھی۔ جس کے قصے اب تک لوگوں کی زبان پر تھے لیکن تین دہائی کے بعد اسی لچھمی کا جب انتقال ہوتا ہے تو گنتی کے چند مزدور اس کی ارتھی کے ساتھ ہوتے ہیں۔