جب ان کی بزم میں ہر خاص و عام رسوا ہے

عجیب کیا ہے اگر میرا نام رسوا ہے

راہ میں اس کی چلیں اور امتحاں کوئی نہ ہو

کیسے ممکن ہے کہ آتش ہو دھواں کوئی نہ ہو

یہ سوچا ہے کہ تجھ کو سوچنا اب چھوڑ دوں گا میں

یہ لغزش مجھ سے لیکن بے ارادہ ہو ہی جاتی ہے

کیسے ممکن ہے کہ قصے جس سے سب وابستہ ہوں

وہ چلے اور ساتھ اس کے داستاں کوئی نہ ہو

جگنو ہوا میں لے کے اجالے نکل پڑے

یوں تیرگی سے لڑنے جیالے نکل پڑے

بڑھانا ہاتھ پکڑنے کو رنگ مٹھی میں

تو تتلیوں کے پروں کا دراز ہو جانا

تجھ سے دل میں جو گلہ تھا وہ نہ لائے لب پر

پھر سے ہم بھر گئے زخموں کو ہرا کیا کرتے

کہانی ہو کوئی بھی تیرا قصہ ہو ہی جاتی ہے

کوئی تصویر دیکھوں تیرا چہرہ ہو ہی جاتی ہے