hubb-e-duniyā ulfat-e-zar dil se dam-bhar kam nahīñ

us par ai zāhid irāda hai ḳhudā kī yaad kā

hubb-e-duniya ulfat-e-zar dil se dam-bhar kam nahin

us par ai zahid irada hai KHuda ki yaad ka

ḳhuub hī phir to samajhtā maiñ dil-e-dushman se

ek saa.at mire pahlū meñ agar tū hotā

KHub hi phir to samajhta main dil-e-dushman se

ek saat mere pahlu mein agar tu hota

kyā us harām-ḳhor ko juz murda hai nasīb

aayā na muñh meñ gor ke luqma halāl kā

kya us haram-KHor ko juz murda hai nasib

aaya na munh mein gor ke luqma halal ka

mazmūn ke bhī sher agar hoñ to ḳhuub haiñ

kuchh ho nahīñ ga.ī ġhazal-e-āshiqāna farz

mazmun ke bhi sher agar hon to KHub hain

kuchh ho nahin gai ghazal-e-ashiqana farz

saikḌoñ man se bhī zanjīr mirī bhārī hai

vaah kyā shaukat-e-sāmān-e-gunah-gārī hai

saikDon man se bhi zanjir meri bhaari hai

wah kya shaukat-e-saman-e-gunah-gari hai