رفیق حسین کے افسانے

کلوا

یہ ایک کتے کی اپنے مالک سے وفاداری، چاہت اور محبت کے لیے تڑپنے کی کہانی ہے۔ پلے سے کتا ہونے کے دوران کلوا کو دو ہی ایسے مالک ملے تھے جن سے اسے گہرا لگاؤ ہو گیا تھا۔ ایک تھا اسکول میں پڑھنے والا بچہ اور دوسری تھی کہار کی بیٹی۔ مگر دونوں میں سے کسی کے پاس بھی وہ زیادہ عرصہ نہیں رہ سکا تھا۔ دوبارہ لوٹنے پر کہار کی بیٹی اسے پہچان نہیں سکی تھی اور اسکول کے بچے کو تالاب میں ڈوبنے سے بچانے کے لیے اس نے خود اپنی جان دے دی تھی۔

گوری ہو گوری

یہ انسان اور جانوروں کے درمیان ایک محبت بھرے رشتہ کی کہانی ہے۔ گوری نام کی گائے شور سے اپنی گاؤں لوٹتی ہے اور سیلاب میں پھنسی اپنی مالک کی بیٹی کو بچاتی ہے۔ اس کے بعد وہ اپنے بچھڑے کے پاس جاتی ہے اور گوری کی پیٹھ پر بیٹھی لڑکی بچھڑے کا رسا کھول کر اسے بھی بچا لیتی ہے۔

بےزبان

’’یہ کہانی سرکس کی ایک گھوڑی اور اس پر سوار ہونے والی نوعمر گونگی لڑکی کے آپسی رشتے اور محبت کی داستان بیان کرتی ہے۔ گھوڑی پر سوار ہونے والی لڑکی کی خوبصورتی کے قصے سن کر ایک نواب اسے خرید لیتا ہے اور گھوڑی کو اس کا مالک ایک تانگے والے کو بیچ دیتا ہے۔ پندرہ سال بعد اتفاق سے وہ لڑکی اور گھوڑی پھر ملتے ہیں اور دونوں ایک ساتھ جان دے دیتے ہیں۔‘‘

کفارہ

’’یہ ایک ایسے شخص کی کہانی ہے، جو زمیندار کے بیٹے کا قتل کرکے ترائی کے جنگلوں میں چھپ جاتا ہے۔ انہیں جنگلوں میں شیر شیرنی کا ایک جوڑا بھی رہتا ہے۔ ایک روز شیرنی اس شخص کو مار ڈالتی ہے تو شیر اسے چھوڑکر چلا جاتا ہے۔ شیرنی اور اس کے بچوں کو بستی والے مار ڈالتے ہیں اور شیر کو پنجرے میں بند کر لیتے ہیں۔ پنجرے میں بند شیر جب دنیا کے نظام پر غور کرتا ہے اور سوچتا ہے کہ یا رب یہ دنیا کن گنا ہوں کا کفارہ ہے۔‘‘