āñkheñ dhokā de ga.iiñ paañv chhoḌ ga.e saath

sabhī sahāre duur haiñ kis kā pakḌeñ haath

aankhen dhoka de gain panw chhoD gae sath

sabhi sahaare dur hain kis ka pakDen hath

bhale bure bartāo kā hai itnā sā raaz

gūñje palaT ke jis tarah gumbad kī āvāz

bhale bure bartao ka hai itna sa raaz

gunje palaT ke jis tarah gumbad ki aawaz

bichhḌe huoñ ke aaj phir ḳhat kuchh aise aa.e

jaise paTrī rail kī duur pe ik ho jaa.e

bichhDe huon ke aaj phir KHat kuchh aise aae

jaise paTri rail ki dur pe ek ho jae

ek bagūla saañs kā havā jise tairā.e

havā havā meñ jā mile bas maaTī rah jaa.e

ek bagula sans ka hawa jise tairae

hawa hawa mein ja mile bas maTi rah jae