سید ظہیر الدین حسین نام، ظہیر تخلص۔۱۸۲۵ء میں دہلی میں پیدا ہوئے۔ بارہ سال کی عمر میں آپ فارسی کی درسی کتابیں اور عربی کی چندابتدائی کتابیں پڑھنے پائے تھے کہ دربار شاہی میں ملازم ہوگئے۔ ان کے والد خوش نویسی میں بہادر شاہ ظفر کے استاد تھے۔ظہیر ترقی کرکے بہادر شاہ ظفر کے داروغۂ ماہی ومراتب مقرر ہوئے اور راقم الدولہ خطاب پایا۔ شعروسخن کا شوق کم سنی سے تھا۔ذوق کے شاگرد تھے۔۱۸۵۷ء کی جنگ آزادی کے بعد پہلے بریلی پھر رام پور چلے گئے۔ کچھ عرصہ بعد اخبار ’’جلوۂ طور‘‘ کے ایڈیٹر ہوگئے جو بلند شہر سے نکلتا تھا۔ مہاراجا الور نے ان کے مضامین کو بہت پسند کیا اور ان کو الور بلا لیا۔ وہاں کی سازشوں سے دل برداشتہ ہو کر جے پور میں تقریباً انیس برس رہے۔ پندرہ برس ٹونک میں رہے۔ آخری عمر میں حیدر آباد(دکن) چلے گئے او روہیں مارچ۱۹۱۱ء میں انتقال ہوا۔ چار دیوان ان کی یادگار ہیں۔