اظہر نواز 18 جون 1995 کو صوبہ اتر پردیش کے تاریخی شہر اعظم گڑھ میں پیدا ہوئے۔ اظہر نے جامعہ ملیہ اسلامیہ سے انگریزی میں ایم اے کیا اور فی الحال علی گڑھ مسلم یونیورسٹی سے انگریزی ادب میں پی ایچ ڈی کی ہے۔

جہاں تک ان کی شاعری کا تعلق ہے وہ بہت سنبھل کر شعر کہتے ہیں۔ ان کے اشعار کی زبان سادہ و سلیس ہے۔ رواں بحروں اور مانوس لفظیات کے حوالے سے انھوں نے جو شعری پیکر تراشے ہیں ان میں عصری حسیت بھی ہے اور جاذبیت بھی جنہیں پڑھ کر معنویت کے نئے در کھلتے ہیں۔ اظہر کے پسندیدہ شاعروں میں مرزا غالب، میر تقی میر، داغ دہلوی، عرفان صدیقی، شکیب جلالی، احمد فراز، فرحت احساس وغیرہ کے نام شامل ہیں۔ ریختہ سے شائع شدہ نسل نو کے منتخب کلام کے شعری مجموعے "قافلہ نوبہار" میں اظہر کی نمائندہ غزلیات شائع ہو چکی ہیں۔