aa jao ab to zulf pareshan kiye hue

aa jaao ab to zulf pareshāñ kiye hue

ham raah par haiñ sham.a farozāñ kiye hue

māyūs qalb hai tirī aamad kā muntazir

dahlīz par nigāh ko chaspāñ kiye hue

ahd-e-vafā ko toḌ ke ham bhī haiñ muzmahil

tum bhī udhar ho chaak garebāñ kiye hue

aao to mere sahn meñ ho jaa.e raushnī

muddat guzar ga.ī hai charāġhāñ kiye hue

baiThe haiñ tishna-kām sar-e-rahguzar tamām

saaqī tirī sharāb kā armāñ kiye hue

aa jaao ki bahār hai apne shabāb par

'ibn-e-chaman' ke vasl kā sāmāñ kiye hue

aa jao ab to zulf pareshan kiye hue

hum rah par hain shama farozan kiye hue

mayus qalb hai teri aamad ka muntazir

dahliz par nigah ko chaspan kiye hue

ahd-e-wafa ko toD ke hum bhi hain muzmahil

tum bhi udhar ho chaak gareban kiye hue

aao to mere sahn mein ho jae raushni

muddat guzar gai hai charaghan kiye hue

baiThe hain tishna-kaam sar-e-rahguzar tamam

saqi teri sharab ka arman kiye hue

aa jao ki bahaar hai apne shabab par

'ibn-e-chaman' ke wasl ka saman kiye hue