aabaad ab na hoga mai-KHana zindagi ka

ābād ab na hogā mai-ḳhāna zindagī kā

labrez ho chukā hai paimāna zindagī kā

aa ḳhvāb meñ kisī din ai rashk-e-māh-e-tābāñ

kar de zarā munavvar kāshāna zindagī kā

vo taaza dāstāñ huuñ marne ke ba.ad un ko

aa.egā yaad merā afsāna zindagī kā

parda zarā uThā de bāñkī idāroñ vaale

afsāna kahne aayā dīvāna zindagī kā

ummīdeñ miT na jaa.eñ nazreñ na pher zālim

barbād kar na merā kāshāna zindagī kā

hai vaqt-e-naz.a zālim bālīñ pe dekh kar

dam toḌtā hai kaise dīvāna zindagī kā

ḳhūn-e-jigar bahā kar āñkhoñ se apnī 'anvar'

rañgīn kar rahā huuñ afsāna zindagī kā

aabaad ab na hoga mai-KHana zindagi ka

labrez ho chuka hai paimana zindagi ka

aa KHwab mein kisi din ai rashk-e-mah-e-taban

kar de zara munawwar kashana zindagi ka

wo taza dastan hun marne ke baad un ko

aaega yaad mera afsana zindagi ka

parda zara uTha de banki idaron wale

afsana kahne aaya diwana zindagi ka

ummiden miT na jaen nazren na pher zalim

barbaad kar na mera kashana zindagi ka

hai waqt-e-naza zalim baalin pe dekh kar

dam toDta hai kaise diwana zindagi ka

KHun-e-jigar baha kar aankhon se apni 'anwar'

rangin kar raha hun afsana zindagi ka