aabaadiyon mein dasht ka manzar bhi aaega

ābādiyoñ meñ dasht kā manzar bhī aa.egā

guzroge shahr se to mirā ghar bhī aa.egā

achchhī nahīñ nazākat-e-ehsās is qadar

shīsha agar banoge to patthar bhī aa.egā

sairāb ho ke shaad na hoñ rah-ravān-e-shauq

raste meñ tishnagī kā samundar bhī aa.egā

dair o haram meñ ḳhaak uḌāte chale chalo

tum jis kī justujū meñ ho vo dar bhī aa.egā

baiThā huuñ kab se kūcha-e-qātil meñ sar-nigūñ

qātil ke haath meñ kabhī ḳhanjar bhī aa.egā

sarshār ho ke jā chuke yārān-e-mai-kada

saaqī hamāre naam kā sāġhar bhī aa.egā

is vāste uThāte haiñ kāñToñ ke naaz ham

ik din to apne haath gul-e-tar bhī aa.egā

itnī bhī yaad ḳhuub nahīñ ahd-e-ishq kī

nazroñ meñ tark-e-ishq kā manzar bhī aa.egā

rūdād-e-ishq is liye ab tak na kī bayāñ

dil meñ jo dard hai vo zabāñ par bhī aa.egā

jis din kī muddatoñ se hai 'naushād' justujū

kyā jaane din hameñ vo mayassar bhī aa.egā

aabaadiyon mein dasht ka manzar bhi aaega

guzroge shahr se to mera ghar bhi aaega

achchhi nahin nazakat-e-ehsas is qadar

shisha agar banoge to patthar bhi aaega

sairab ho ke shad na hon rah-rawan-e-shauq

raste mein tishnagi ka samundar bhi aaega

dair o haram mein KHak uDate chale chalo

tum jis ki justuju mein ho wo dar bhi aaega

baiTha hun kab se kucha-e-qatil mein sar-nigun

qatil ke hath mein kabhi KHanjar bhi aaega

sarshaar ho ke ja chuke yaran-e-mai-kada

saqi hamare nam ka saghar bhi aaega

is waste uThate hain kanTon ke naz hum

ek din to apne hath gul-e-tar bhi aaega

itni bhi yaad KHub nahin ahd-e-ishq ki

nazron mein tark-e-ishq ka manzar bhi aaega

rudad-e-ishq is liye ab tak na ki bayan

dil mein jo dard hai wo zaban par bhi aaega

jis din ki muddaton se hai 'naushad' justuju

kya jaane din hamein wo mayassar bhi aaega