aaj yaadon ne ajab rang bikhere dil mein

aaj yādoñ ne ajab rañg bikhere dil meñ

muskurāte haiñ sar-e-shām savere dil meñ

ye tabassum kā ujālā ye nigāhoñ kī sahar

log yuuñ bhī to chhupāte haiñ añdhere dil meñ

sūrat-e-bād-e-sabā qāfila-e-yād aayā

zaḳhm-dar-zaḳhm khile phuul se mere dil meñ

yaas kī raat kaTī aas kā sūraj chamkā

phir bhī chamke na kisī roz savere dil meñ

ik mirī vahshat-e-be-nām pe is tarah na soch

kitnī bāteñ haiñ jo khaTkī nahīñ tere dil meñ

dhyān kī sham.a kī lau tez bhī kar dete haiñ

aksar auqāt tirī yaad ke phere dil meñ

na milī fursat-e-āsā.ish-e-ta.abīr-e-urūj

ek muddat se haiñ ḳhvāboñ ke basere dil meñ

aaj yaadon ne ajab rang bikhere dil mein

muskuraate hain sar-e-sham sawere dil mein

ye tabassum ka ujala ye nigahon ki sahar

log yun bhi to chhupate hain andhere dil mein

surat-e-baad-e-saba qafila-e-yaad aaya

zaKHm-dar-zaKHm khile phul se mere dil mein

yas ki raat kaTi aas ka suraj chamka

phir bhi chamke na kisi roz sawere dil mein

ek meri wahshat-e-be-nam pe is tarah na soch

kitni baaten hain jo khaTki nahin tere dil mein

dhyan ki shama ki lau tez bhi kar dete hain

aksar auqat teri yaad ke phere dil mein

na mili fursat-e-asaish-e-tabir-e-uruj

ek muddat se hain KHwabon ke basere dil mein