aandhiyon ka KHwab adhura rah gaya

āñdhiyoñ kā ḳhvāb adhūrā rah gayā

haath meñ ik sūkhā pattā rah gayā

shahr to sābit huā shahr-e-ḳhayāl

aañkh meñ bas ik dhuñdlakā rah gayā

aa ga.e bārish ke din dīvār par

ik zarā sā rañg kachchā rah gayā

khilkhilā kar dhuup pīchhe haT ga.ī

hote hote ik tamāshā rah gayā

rāste ik dūsre meñ kho ga.e

haath meñ saḌkoñ kā naqshā rah gayā

achchhe achchhe sab khilaune bik ga.e

shaam kā sunsān melā rah gayā

mahfiloñ kī bhī fazā ma.alūm hai

kyā huā jo maiñ akelā rah gayā

aandhiyon ka KHwab adhura rah gaya

hath mein ek sukha patta rah gaya

shahr to sabit hua shahr-e-KHayal

aankh mein bas ek dhundlaka rah gaya

aa gae barish ke din diwar par

ek zara sa rang kachcha rah gaya

khilkhila kar dhup pichhe haT gai

hote hote ek tamasha rah gaya

raste ek dusre mein kho gae

hath mein saDkon ka naqsha rah gaya

achchhe achchhe sab khilaune bik gae

sham ka sunsan mela rah gaya

mahfilon ki bhi faza malum hai

kya hua jo main akela rah gaya