aap hi apna safar dushwar-tar maine kiya

aap hī apnā safar dushvār-tar maiñ ne kiyā

kyuuñ malāl-e-furqat-e-dīvār-o-dar maiñ ne kiyā

mere qad ko nāpnā hai to zarā is par nazar

choTiyāñ ūñchī thiiñ kitnī jin ko sar maiñ ne kiyā

chal diyā manzil kī jānib kārvāñ mere baġhair

apne hī shauq-e-safar ko ham-safar maiñ ne kiyā

manzileñ detī na thiiñ pahle mujhe apnā surāġh

phir junūñ meñ manziloñ ko rahguzar maiñ ne kiyā

har qadam kitne hī darvāze khule mere liye

jaane kyā sochā ki ḳhud ko dar-ba-dar maiñ ne kiyā

lafz bhī jis ahd meñ kho baiThe apnā e'tibār

ḳhāmushī ko is meñ kitnā mo'tabar maiñ ne kiyā

zindagī tartīb to detī rahī mujh ko 'nasīm'

apnā shīrāza magar ḳhud muntashar maiñ ne kiyā

aap hi apna safar dushwar-tar main ne kiya

kyun malal-e-furqat-e-diwar-o-dar main ne kiya

mere qad ko napna hai to zara is par nazar

choTiyan unchi thin kitni jin ko sar main ne kiya

chal diya manzil ki jaanib karwan mere baghair

apne hi shauq-e-safar ko ham-safar main ne kiya

manzilen deti na thin pahle mujhe apna suragh

phir junun mein manzilon ko rahguzar main ne kiya

har qadam kitne hi darwaze khule mere liye

jaane kya socha ki KHud ko dar-ba-dar main ne kiya

lafz bhi jis ahd mein kho baiThe apna e'tibar

KHamushi ko is mein kitna mo'tabar main ne kiya

zindagi tartib to deti rahi mujh ko 'nasim'

apna shiraaza magar KHud muntashar main ne kiya