aarif azal se tera amal mominana tha

'ārif' azal se terā amal momināna thā

haañ ġham ye thā ki fikr kā Dhab kāfirāna thā

tū mujh se duur rah ke bhī mere qarīb thā

har chand tū ḳhudā kī tarah thā ḳhudā na thā

tanhā.ī-e-basīt kā vo ahd yaad kar

jab tere paas koī bhī tere sivā na thā

thā e'timād-e-husn se tū is qadar tahī

ā.īna dekhne kā tujhe hausla na thā

maiñ ne kiyā hai tujh ko tire rū-ba-rū magar

khīñch jā.egā mujhī se tū mujh ko patā na thā

baḳhshā hai tū ne merī vafā ko ḳhud apnā rañg

varna mirī nigāh meñ koī sila na thā

umr-e-azīz rā-navardī meñ kaT ga.ī

manzil ne dī ḳhabar ki musāfir chalā na thā

aa.ī hai gulsitāñ se mirī samt kis liye

jab naama mere naam koī ai sabā na thā

kunj-e-qafas meñ sar-ba-garebāñ paḌā huuñ maiñ

'ārif' chaman meñ koī mirā ham-navā na thā

'arif' azal se tera amal mominana tha

han gham ye tha ki fikr ka Dhab kafirana tha

tu mujh se dur rah ke bhi mere qarib tha

har chand tu KHuda ki tarah tha KHuda na tha

tanhai-e-basit ka wo ahd yaad kar

jab tere pas koi bhi tere siwa na tha

tha e'timad-e-husn se tu is qadar tahi

aaina dekhne ka tujhe hausla na tha

main ne kiya hai tujh ko tere ru-ba-ru magar

khinch jaega mujhi se tu mujh ko pata na tha

baKHsha hai tu ne meri wafa ko KHud apna rang

warna meri nigah mein koi sila na tha

umr-e-aziz ra-nawardi mein kaT gai

manzil ne di KHabar ki musafir chala na tha

aai hai gulsitan se meri samt kis liye

jab nama mere nam koi ai saba na tha

kunj-e-qafas mein sar-ba-gareban paDa hun main

'arif' chaman mein koi mera ham-nawa na tha