ab karb ke tufan se guzarna hi paDega

ab karb ke tūfāñ se guzarnā hī paḌegā

sūraj ko samundar meñ utarnā hī paḌegā

fitrat ke taqāze kabhī badle nahīñ jaate

ḳhushbū hai agar vo to bikharnā hī paḌegā

paḌtī hai to paḌ jaa.e shikan us kī jabīñ par

sachchā.ī kā iz.hār to karnā hī paḌegā

har shaḳhs ko ā.eñge nazar rañg sahar ke

ḳhurshīd kī kirnoñ ko bikharnā hī paḌegā

maiñ soch rahā huuñ ye sar-e-shahr-e-nigārāñ

ye us kī galī hai to Thaharnā hī paḌegā

ab shāna-e-tadbīr hai hāthoñ meñ hamāre

hālāt kī zulfoñ ko sañvarnā hī paḌegā

ik umr se be-nūr hai ye mahfil-e-hastī

'ejāz' koī rañg to bharnā hī paḌegā

ab karb ke tufan se guzarna hi paDega

suraj ko samundar mein utarna hi paDega

fitrat ke taqaze kabhi badle nahin jate

KHushbu hai agar wo to bikharna hi paDega

paDti hai to paD jae shikan us ki jabin par

sachchai ka izhaar to karna hi paDega

har shaKHs ko aaenge nazar rang sahar ke

KHurshid ki kirnon ko bikharna hi paDega

main soch raha hun ye sar-e-shahr-e-nigaran

ye us ki gali hai to Thaharna hi paDega

ab shana-e-tadbir hai hathon mein hamare

haalat ki zulfon ko sanwarna hi paDega

ek umr se be-nur hai ye mahfil-e-hasti

'ejaz' koi rang to bharna hi paDega